Shillong, Ïaïong 12: Ka kynhun ïalehkai football jong ka Meghalaya ha ka sngi Ba-ar kala mih na la ka jong ka jylla ban leit ïashim bynta ha ka Senior Men’s National Football Championship (final round) jong ka Santosh Trophy ha Kerala.
Ka Meghalaya ka don lang ha kajuh ka group ryngkat bad ki lai tylli ki jylla kiba dei ki lahduh barim ba kynthup ïa ka West Bengal, Kerala bad Punjab bad ruh bad ka Rajasthan ha ka Group A. Ïa ki jingïalehkai yn pynlong ha ar tylli ki madan ïalehkai jong ka District Malappuram, Kerala.
Ka jylla kan mih madan ban ïakhun nyngkong pyrshah ïa ka Rajasthan ha ka 18 tarik Ïaïong. Ïa kane ka kynhun ïalehkai ba 20 ngut la ïalam da u Bah Bobby Lyngdoh Nongbet kum u coah. Shwa ban mih nala ka jong ka jylla la pynlong ka jingïalang kaba lyngkot ha JN Stadium, Polo ha kaba la ïoh ki kyntien kitbok kitrwiang ïa ki player na u rangïalehkai barim ka ri India bad uba la kylla long mynta u MLA ka Mawphlang Constituency u Bah Eugeneson Lyngdoh ha kajuh ka por u President jong ka Shillong Sports Association (SSA).
Ha kane ka sngi la donlang ruh u khlur ïalehkai ka Indian Super League (ISL) u Redeem Tlang.
“Ngi don ka kynhun jong ki rang samla bad nga ngeit skhem ba ki rangïalehkai kin trei shitom bad nga ngeit skhem ruh ba kin lah ban ïalehkai bha ha katei ka lympung,” ong u Bah Bobby Nongbet. “Da ka jingtrei shitom ka jong ki ha madan, nga ngeit skhem ba ha kane ka kynti ba mynta ngin lah ban wanrah ka jingkylla.”
Ki don katto katne ki player bala kham rangbah kiba khlem lah ban ïashim bynta ha kane ka wat ïakhun kaba khatduh na kiba bun ki kam ba ki hap ban pyndep bad kiba don ha ka jingïalehkai I-League, bad kane kala kham pynkhuslai ïa u coach, bad watla ka kynhun kam da ïoh ka por kaba biang ban praktis pynban kiba bun kine ki rangïalehkai jong ka kynhun kila kiew bha ha ka rukom ïalehkai.
“Lada ki player ki ïalehkai bha kumba kila dep ban praktis, kan ym don kano kano ka jingartatien ba ngin poi sha ka thong jong ka jingjop. Ngin ym kheiñ sting ïa kane ka jingïalehkai hynrei ngin ïakhun tyngeh da ka thong ban ïoh ka jingjop. Kyrmen skhem ruh ba phin kyrshan ïangi ha ki liang baroh. U Blei Un kyrkhur ïa ka Meghalaya,” pynkut u Bah Nongbet.
Haba phai sha ka Group B ki kynthup ïa ka Gujarat, Karnataka, Odisha, bad ka lahduh haduh mynta ka Manipur.
Ki ar tylli ki top team na kawei ka group kin ïoh rung sha ka semifinal. Ïa ka wat ïakhun final nyngkong la pynbeit ban pynlong ha u Kyllalyngkot hynrei la pynkynriah noh na ka daw ka jingshah pynthut ha ka khlam jingpang Covid-19.
Ki rangïalehkai ka Meghalaya: Henry Ford Nongneng, Maxderidoff Wahlang, Hardy Cliff Nongbri, Dawanplielad Myrchiang, Wilbert Donboklang Marbaniang, Saveme Tariang, Santi Janai Shianglong, Figo Syndai, Sambor Oneel Kharsahnoh, Stephanson Pale, Aibiangmame Nongneng, Dawanchwa Carlos Challam, Shano Tariang, Raikutshisha Buam, Eveningstar Bareh, Atlanson Kharmaw, Frolicson Dkhar, Manbhakupar Iawphniaw, Kynsaibor Lhuid, Gladdy Nelson Kharbuli
Support staff: Bobby Lyngdoh Nongbet (coach), Dious Lapasam (assistant coach), Mayoustar Warbah (manager), Greater D Lapasam (physio)
