Shillong, Ïaïong 18: U Dr. Antarwell Warjri, Nonghikai ka Williamnagar Government College, u la pynmih ïa ka kot ba la ai kyrteng “Role of Regional Political Parties in the Success and Failures of Coalition Government in Meghalaya” lane Ka bynta ki Seng Riewlum ha ka jingjop bad ka jingpulom ka Synshar khleh khawlang ha Meghalaya.
U Dr. Antarwell, haba ïakren bad u Mawphor, u la ïathuh ba kane ka kot kadei kaba shim na ka Thesis kaba u la leh research ha ka Ph.D na William Carey University.
“Ïa kane ka kot, nga la thoh na ka bynta ki samla pule College khamtam kiba pule ha ka Sixth Sememester jong ka course ba la buh da ka NEHU. U la ong ba kan long ruh ka jingmyntoi na ka bynta ki paidbah, namar ba ka kot ka batai ba kumno ka jingbun palat ki Seng Riewlum ka pyntlot ïa ka jingsynshar ha ka jylla namar ban don beit ki sorkar synrop.
“Ha ka sorkar synrop, u Myntri Rangbah um ïoh por ban peit na ka bynta ka roi ka par, hynrei u hap pyllut por ban pynhun ki Seng ne Party kiba don ha ka sorkar”, la ong u Dr. Warjri.
Ka daw ka jingwan ki sorkar synrop ha Meghalaya, la ong u Doktor, kadei namar ki jingdon bun palat ki Seng Riewlum kaba pynduhlang ïa ki ba kin jop bun ki MLA tang kawei ka Party. U la ïathuh ruh ba ha kane ka kot kiba bun ki paidbah katkum ka research kaba u la leh, ka long ba ki kwah ba lada long kaba lah dei ban don beit tang kawei ka Party Riewlum bad ba ki nongïalam, lada long kaba lah kin nym seng ne thaw shuh kiwei pat ki Party Riewlum.
U la ong ha ki snem ba mynshuwa ha ka jylla don tang ka Seng Congress bad katto katne ki Seng Riewlum. Hynrei mynta ba la wan sa ka NPP, ki Seng Riewlum ki la nang tlot bad nang duh bor shuh shuh. “Kaba bha hi ka long ba dei ban ïatylli lang tang ha kawei ka Seng Riewlum”, u la ong ha kane ka kot.
U Dr. Antarwell u la ïathuh ruh ba ha kane ka kot, kaba don hynñiew lynnong, u la batai ïa ki Sorkar synrop kiba la synshar ïa ka jylla Meghalaya naduh u snem 1978 haduh 2018.
Ïa kane ka kot kaba u la pynmih hadien ba u la ïoh jingbit na ka University ba u pyndep ïa ka Ph.D, lah ban ïoh na Ri Khasi Book Agency bad ka dor jong ka, ka long 650 tyngka kawei.
