Mih ka jingkynad bad thma ktien, byrngem ki paidbah ban weng hi lada ym urlong ka jingïakren

Nongpoh, Nailar 11: Tang hadien lai sngi ba ka Assam State Electricity Board (ASEB) ha ka 9 tarik Nailar 2025 ka la wan shna bad thung ar tylli ki post ilektrik ha u pud u sam ka shnong Maikhuli, mynta ka sngi ka la mih ka jingïakynad bad ka thma ktien kaba jur hapdeng ki paidbah nongshong shnong ka Maikhuli, bad ki nongshong shnong ka jylla Assam ha katei ka jaka khappud.
Kumba la ioh jingtip, naduh ka sngi Saitjain ki paidbah ka Maikhuli ki la pyrshah halor ka jingwan thung post ilektrik da ka ASEB hapoh ka shnong Maikhuli, bad ka bor shnong ka la pyntip sha ka bor synshar District ban leh ïa kaba donkam ban weng noh ïa kitei ki post. Hynrei, na ka daw ka jingpynibor ki briew na Assam, ka jingïapyrshah ka la mih mynta ka sngi haduh ba la hap ban wan poi ki Magistrate bad ki pulit na Ri Bhoi bad na Kamrup ban tem ïa katei ka jingkynad.
La ong ruh ba ka daw ba ka jinghuri hura ka la mih ka dei na ka jingkynshoit bad jingpynsngewthuh bakla uwei u nong Assam ba kyrteng u Madhav Deka, uba la ïalam bakla ïa ki paidbah na ki shnong khappud ka Assam, bad haka jingshisha ïa katei ka kam la dei ban ïakren bad pynbeit da ki bor district ka Ri-Bhoi bad Kamrup.
Na ka jingkynshoit utei u briew, ka jingïakynad ka la nangjur bad haduh ba ki paidbah Assam kim salia shuh wat ban burom ïa ki bor synshar District kiba la leit ban pynbeit.
Haduh mynta, ka shnong ka dang ap ïa ka rai jong u Deputy Commissioner ka Ri Bhoi ban ïa kren mardor bad u Deputy Commissioner ka Kamrup. Lada ka jingïakren kam urlong, ki paidbah ka Maikhuli ki la rai ba kin weng noh da lade ïa kitei ki post ilektrik kiba la thung beaiñ ha u pud u sam ka shnong kaba hap hapoh ka jylla Meghalaya.