Mih ka jingïania hapdeng u Dr. Mukul bad u Bah Prestone halor ka dur u Conrad bad u nongkhaïi drok

Shillong, Nailur 20: Ka jingwanrah u Dr. Mukul Sangma ïa ka jingïashon dur u Myntri Rangbah, u Conrad Sangmabad u Henry Lalrengsanga, uba la shah kynnoh ba udei u nongkhaïi drok ba snar hynnin ka sngi, ka la mih biang mynta ka sngi ha ïingdorbar, haba u Myntri ka tnad Parliamentary Affairs, u Bah Prestone Tynsong u la kyntu ïa u Shongknor ban weng noh ïa kane ka bynta kaba la wanrah da u MLA ka Songsak hapoh ïingdorbar.
Haba u Bah Tynsong u ladep ong kumne, u Dr. Mukul u la ïeng ban pynshai ba um shym la wanrah kano kano ka jingkynnoh sniew ïa u Myntri Rangbah ka jylla, hynrei u la shu wanrah ba kan long kum ka jingmaham ïa ki para MLA bad khamtam eh ba u sngewkhia ïa la u jong Myntri Rangbah ba un nym shah thad kulmar kumba la mih ha lad khubor Buisness Standard ha Delhi. U la ong ba ym donkam ban weng ïa kane ka mat na ka jingïakren hapoh ïingdorbar.
“Ngam shym la wanrah hapoh ïingdorbar halor ka jingïadei u Myntri Rangbah bad une u briew na Mizoram. Bun ki Minister ki tip ba u Lamremsanga u ju wan borabor ha Secretariat bad u ju leit ruh ha ïng jong u Myntri Rangbah”, la ong u Dr. Mukul, da kaba bynrap balei ba ka sorkar MDA ka phuh syep haduh katne katne ïa kane ka kam.
U Bah Prestone u la ïeng ban ïada tyngeh ïa u Conrad da kaba ong ba ka jingïashon dur badno badno kam dei pat ba long ka ishu hapoh ïingdorbar, namar wat u Dr. Mukul ruh u ju ïashon dur bad kiba bun ki briew. “Hato ïakata yn wanrah noh hapoh ïingdorbar?”, la ong u Symbud Myntri Rangbah.
U Conrad uba la shu sngap naduh hynnin halor kane ka jingïakren u Dr. Mukul Sangma bad u Bah Prestone wat lada ka jingïakren kadei halor jong u, u la ïeng mynta ka sngi ban pynpaw ba kane ka jingleh u Dr. Mukul Sangma, uba long u nongmihkhmat uba la kham rangbah ka long ka bym dei satia. “Kam long kaba dei ban shu wanrah ïa ka dur kaba la shon shawei ban pynïasnoh pat da kumwei hapoh ïingdorbar”, la ong Conrad Sangma.
U la ong ruh ba u Dr. Mukul udei ban da tih bniah ïa kane ka kam, namar hato u tip kane ka kam ka la poi shano. Hato u tip ba ka ïingbishar ka ladep ban shim bishar bad ka la pyllait ïa u na kane ka jingshah kynnoh. “Hato u MLA ka TMC u tip ia kane?”, la ong u Myntri Rangbah. U Conrad u la ong ruh ba lada u Dr. Mukul u kwah ban wanrah ban ïakren ïa kane ka kam, u lah ban wanrah ha kawei pat ka rukom, ïa kaba u Dr. Mukul u la ong, “Ngin sa leh beit ïa kata”. Hamar kata ka por la ïoh sngew ba u Bah Prestone u la ong, “Ngi pdiang sngewbha..ngi pdiang sngewbha”.
Na ka liang u Shongknor, u Thomas Sangma, u la pyntip ba la weng noh ïa ka bynta ba wanrah u Dr. Mukul da ka Mobile na ki record jong ka Assembly.