Mih ka huri hura ha ka jingia kajia pud hapdeng ka shnong Bataw bad shnong Pynurkba ha EJHD

Khliehriat, Nailur 8 : Ki nongshong shnong jong ka shnong Bataw hapoh ka jingïalam u Waheh Shnong, u bah Deihok Sumer mynta ka sngi ki la ïa mih paidbah bad kynthei bad shynrang bad tur sha ka jaka ba don ka jingïakajia pud bad ka shnong Pynurkba bad ki la pynsangeh shisyndon ïa ka jingthmu ban kit maw ki briew kiba na shnong Pynurkba kiba la thep maw hapoh ka trok bad kam ba ka dei ka jaka kaba dang hap hapoh u pud u sam jong ka shnong Bataw.
Shuh shuh ka shnong Bataw ka la rah da ka JCB sha kane ka jaka bad tih ïa ka jaka bad kam ba ka dang hap hapoh shnong Bataw
Hadien katto katne por la wan poi sa ki bor pulit kiba na Ladrymbai Outpost bad u Waheh Shnong Pynurkba, u bah Syrdeplang Ryngkhlem lem bad ki nongshong shnong ka Pynurkba, ha ka jingiakynduh lang jong ki nongshong shnong kiba na baroh ar tylli ki shnong ka la jan mih ka huri hura bad ka la don ka jingia pynphai nia mar kylliang jong ki nongshong shnong ne ka thma ktien kaba jur bha bad dei da ka jingdon ki pulit la lah pat ban tehlakam bad pyn jai jai ïa ka jingia bitar ki nongshong shnong kiba na baroh ar tylli ki shnong.
Na ka liang ki bor pulit haduh mynta ki dang long peitngor ban wanrah ïa ka shong suk shong saiñ ha kitei ki shnong ha Bataw bad ha Pynurkba.
Na ka liang u Waheh Shnong Bataw, u bah Deihok Sumer u la ong “Na ka liang ka Dorbar Shnong Bataw mynta ka sngi ngi wan ha kane ka jaka ha Lyngkien Tariang halor ka nongrim ba kum ka shnong ngi la dep ai ïa ka jingthoh sha u CEM ka Jaiñtia Hills Autonomous District Council na ka bynta ban shim khia halor kane ka jingiakajia pud jong ngi hapdeng ka shnong Bataw bad ka shnong Pynurkba, ngi la ai jingthoh naduh ka 25 tarik u naitung 2025, na ka liang ka shnong ngi dap da ka jingsngew khia namar ka ophis u CEM kam pat shim khiaha kaba ïadei bad kane ka kam kaba long ruh ka kam kaba lah ban wanrah ne poi pynban sha ki jingjia ki bym sngewtynnad, balei nga ong kumne namar myn ha ka 27 tarik u bnai naitung na ka shnong Pynurkba ka la wan ban kyntur pud sha u pud u sam jong ka shnong Bataw”
U Waheh Shnong Bataw u la ong ruh ba mynta ka sngi ka la mih ruh ka jingshah byrngem jing pyntieng pyn smiej na ki briew kiba na ka shnong Pynurkba, namar ki nongshong shnong jong ka Bataw ha ka jingiaid lynti ki hap iaid lyngba na ka shnong Pynurkba, kumta u la buh ka jingkyntu ïa ka shnong Pynurkba ba lada ki shim ïa ka aiñ ha kti na ka liang ka shnong Bataw ruh kan shim ïa ka aiñ ha kti, bad u la dawa ruh ïa ka shnong Pynurkba ka kan wan sha ka shnong Bataw da ka jingiakren ïa sngewthuh bad lada jia kumno kumno ïa ki nongshong shnong ka Bataw, ka shnong Pynurkba ka dei ban shim ïa ka jingkitkhlieh bad ong ruh ba ka shnong Bataw kan sa buh da ka jingthoh sha ki bor ka aiñ halor kane ka jingkren pyntieng pynsmiej kaba mih na ki nongshong shnong jong ka shnong Pynurkba.
“Ban pynskhem ïa ki pud ki sam ngi la mih mynta ka sngi namar ki nongshong shnong ka shnong Pynurkba ka la ïaid lait ha kaba ki la kyntur pud bad pyntrei sha ki jaka ba hap ha u pud u sam jong ka shnong Bataw, ngim kwah mano mano ban shu wan lute lada khlem ka jingmynjur ka dorbar shnong, shuh shuh ruh ka shnong Pynurkba ka la pynjulor ïa ka lynti ka ban leit sha Umlasnam kaba ki nongshong shnong ki ju leit kit shyiap, ki ju leit kit dieng, ngi sngew khia ïa kane bad nga sngew ban ong ba kane ka jaka ka dang don ha ka jingïakajia haduh mynta kumta ngi kum ka shnong Bataw ngi dawa jur na ka ophis u CEM ba u dei ban shim khia noh mardor ban pynbeit ïa kane lym kumta ngi na ka liang ka shnong ngin ïaid beit bad ngin nym burom shuh ha kaba ngin pynskhem beit ïa ka hok long trai ka jong ngi ïa kane ka jaka kaba katkum ka notification ba la ai naduh ka 4 tarik u bnai nohprah 2008” ong u Waheh Shong Bataw.
U Waheh Shnong Bataw u la ong shuh shuh ba na ka liang ka shnong naduh mynshwa ngi la dep ujor bad pynpaw ba kane ka jaka ba ïa kajia pud ka dei kaba dang hap hapoh ka shnong Bataw hynrei na ka ophis jong ka tnat khlaw, kaba dei ka ophis u CFO bad ka JHADC kim shym la shim khia ïa kane ka kam ban pynbeit hynrei ka ophis u CFO ka la pyllait pynban ïa ka jingthoh myn ha ka 6 tarik u bnai lber 2020, kaba mut ba ka la don ka jingpyllait kot tuh namar katkum ki kot ki sla la lap ba ka jingthoh ba wan jurip ka dei da ka tarik kaba ha hadien kata la jurip ha ka 17 tarik u bnai lber 2020 bad ka jing ioh kot ba jurip pat ka dei ka dei ha ka 6 tarik u bnai lber 2020 kaba don ka jingiapher haduh khatwei sngi “Ngi sngew ban ong ba ka ophis u CFO kam shim satia ïa ka jingkitkhlieh ban wanrah ïa ka jingbha jong ngi ki ar shnong” la bynrap.
Na ka liang u Waheh Shnong Pynurkba, u bah Syrdeplang Ryngkhlem u la ong bad pynpaw ba mynta ka sngi u la ioh jingtip ba ki paidbah na ka shnong Bataw ki la phah pynhap noh ïa u maw ba la thep ha ka trok kit maw ba la thep maw da ki briew kiba na shnong Pynurkba kiba ju im ja ka kane ka jaka “Nga sngewsih ba kane ka ju jia man ka por haba wan trei ki briew kiba na shnong Pynurkba bad ngi ruh ngi pyrshah beit ïa ka jing ong ka shnong Bataw bad ngi pyrshah ruh halor ki nongrim bad ngi don ruh da ki jingthoh ban sakhi ïa kane ba kane ka jaka ba ïa kajia pud ka dang hap hapoh ka shnong Pynurkba”
Uwei na ki dkhot shnong jong ka shnong Pynurkba ruh u la ong “Ngi kum ka nongshong shnong jong ka Pynurkba ngin nym sangngeh ban trei ha kane ka jaka ba iakajia pud namar ma ngi ngi im ja na kane ka jaka, ngi rep synsar, ngi kit dieng, kit maw na kane ka jaka, ïa ka jingong bad jingbthah ka shnong Bataw ban sangeh ban trei ha kane ka jaka ngi ngim pdiang bad ngin nym sangeh ban trei hangne”
Ki dkhot shnong na ka Dorbar Shnong Bataw kiba la don lang ha kane ka sngi ha katei ka jaka ki kynthup ruh u Assistant Waheh Shnong, u bah Martin Lyngdoh, u Assistant Secretary Shnong, u bah Macdonald Suchiang , ki Waheh Shnong barim ba kynthup u bah Bhalang Suchiang, u bah Ros Suchiang , bah Bilis Pyrtuh lem bad ki dkhot shnong ba kynthup u bah Warling Biam, bah Waster Sympli lem bad ki paidbah nongshong shnong.