Shillong, Naiweing 24: Ka jingshong kyllaiñ myngngor bad ka jingthang mombati ba la khot da ki san seng ba kynthup ka Khasi Students’ Union (KSU), ka Federation of Khasi Jaintia and Garo People (FKJGP), ka Hynniewtrep National Youth Front (HNYF), ka Ri Bhoi Youth Federation (RBYF) bad ka Jaintia Students’ Union (JSU) ha ka sngi Palei ban ban pynpaw ïa ka jingsngewsih halor ka jingshah siat ïap ki san ngut ki Khasi ha ki ktang suloi ki pulit Assam ha ka 22 tarik Naiwieng ha Mukroh kaba la pynlong ha mawmot u Woh Kiang Nangbah ka la kut da ka jingkawang petrol bomb bad ka jingshah lun maw bad pyrshang wiang ding ïa ka kali ba kit ïa ki pulit bad ka jingpynpait pynpra ïa ka jaka ïeng ki pulit pynïaid kali ha khmat ka Civil Hospital Shillong.
La sakhi ba hadien ba ki paidbah ki la thang mombati ka don ka jingkawang petrol bomb ïa ki pulit ha Barik Point kiba ïeng ban pahara bad marmar ki pulit ruh ki la siat lyer pynsat khmat ban pynpra ia ki shi kynhun ki briew kiba la kah dur khmat bha kiba tur sha barik Point ka jaka ba ki pulit ki ïeng ban pahara.
La ïohi ba ka don ruh ka jingshah lunmaw kawei ka bos kaba shong ki pulit CRPF kaba wan ban ïaid lyngba ka surokbah ha khmat Civil Hospital hynrei marsien poi ha ka lad ban leit Sha Laban la ïohi ba ki don katto katne ki briew ba la kah durkhmat bha ïa lade kiba leit ban lunmaw haduh ba ki CRPF kiba shong ha katei ka kali ki phet ïap phet im na katei ka jaka ba ka shah lun maw ka kali kaba ki shong.
Ha kane ka jingpyrshang wiang ding kane ka ka bos kam shym la kem ding satia hynrei tang ka jingpait ka ïit namar ka jingshah lun maw bad ka jingshah kawang da ki dieng.
Shuh shuh la sakhi ba ka don ka jingshah pynpra ka jaka ïeng ki pulit pynïaid kali bad ka jingpyrshang wiang ding ruh hynrei kane ruh kam shym la kem ding namar ka jingwan poi ki pulit ban tem noh ïa ka ding shuwa ba kan klang.
Kham hadien katto katne por ruh la ïohi ba ki don ki katto katne ngut kiba la leit ban kynjat ïa kawei ka kali pulit ha phyllaw ka Civil Hospital bad ka jingkthong ïa ki pulit wat shaduh shapoh ka hospital kiba phet krad ïa lade.
Nangta shuh shuh la ïohi ba ar ngut ki pulit kynthei kiba wan pahara ha katei ka jaka ki la shah ker sawdong ha ki paidbah bad ki shah knieh ruh ïa u lathi bad ka stieh jong ki bad kine ki pulit ha ka jingtieng ki la shu hap peit kaei kaba la jia ïa ki bad tang hadien katto kate por ki la ïoh rung noh shapoh ka kyrdop ka Army Holidy Home Stay bad wat hadien kane ruh ki don ki katto katne kiba pyrshang kawang maw.
“Ngi pynbthei katto katne ki bom pynsat khmat ban pynpra ïa ki kynhun kiba lah ban wanrah pat ïa ka jingma ïa ka ïaid ka ïeng ki paidbah namar ka dang dei ha ka por ba ki dang bun ki kali ba leit ba wan bad ngi la la pynïaid noh ïa ka kali ruh lyngba ka surok ban leit sha ka Phan Nonglait Park bad khang noh ïa ka lynti ba leit sha khmat Civil Hospital,” ong u Vivek Syiem, SP (City)
U la ïathuh ruh ba ka don ka jingshah shoh ki lai ngut ki briew ha IGP bad ha Lad Civil Hospital.
Haba la kylli la kum u heh pulit u i donkam ne em ban pynjari korphiw, “Ngam i ba ka donkam ban pynjari korphi ha nongbah hynrei kum ki nongïada ïa ka suk ka saiñ ngi hap long kiba adkar” ong u Bah Vivek.
Shuh shuh u la ïathuh ba na ka liang ki pulit ki la rejister da ka ejahar halor kane ka jingjia.
