Mih jingïakulmar ha ka sngi ïakren u CM bad ki Sengbhalang ha Tura, mynsaw 5 ngut ki Pulit

Tura, Naitung 24: Ka nongbah Tura mynta ha ka Lah Sngi U Blei janmiet, ka la kulmar kynsan kynsan puk, haba ki paidbah kiba ap sha surok ïa ka jingïakren u Myntri Rangbah, u Conrad Sangma bad ki Sengbhalang, kynthup ïa ka Seng ACHIK bad kiwei kiwei de ki Seng, ki la lun maw ïa ki Pulit ap pahara kynthup ruh ïa ki Pulit pahara u Myntri Rangbah.
Ha kane ka jingïakawang maw, kawang shuki, ki dieng bad kiwei kiwei, san ngut ki Pulit ki la mynaw, kynthup ruh ïa ki Kynthei.
Namar ba u paidbah ruh u la bun, ki Pulit ki la siat da ki tear gas bad siat pynma ruh sha suiñ ban pynpra ïa u paidbah. Katba nang miet ka jingïakulmar kala nang jur, haba lai tylli ki Kali Gypsy kiba la suba ba kidei ki kali Pulit ki la shah thang.
Ki khubor ki ïathuh ruh ba u Myntri Rangbah um shym la ïoh lad ban mih da ki bun bun kynta na ka ophis jong u ha Tura namar ba ki paidbah, ki la kerkut bad kim shah ïa u ban mih, hynrei dei tad ynda la kham miet bad kham jai jai ba u sa ïoh mih.
Hadien kane na ka liang ki bor synshar District, ki la pynjari noh da ka Korphiw miet ha nongbah Tura bad la pyntreikam ruh da ka Section 144 Cr. PC ha baroh kawei ka nongbah. La bthah ruh ban pahara jur bad ban talasi ïa baroh ki kali kiba rung ba mih sha Tura.
Kane ka jingïakynduh jong u Myntri Rangbah ïa kine ki Sengbhalang ha ka CM Office, ka long hadien ka jingïakhih shah thngan ki nongïalam ka Seng ACHIK ban dawa ban pynlong noh ïa ka Tura kum ka Winter Capital ne ka jaka treikam jong ka Sorkar Meghalaya ha ka por tlang bad kiwei kiwei de ki jingdawa.
Ki khubor ba la ïoh ki ïathuh ba haba ki nongïalam jong kine ki Seng ki dang ïathuh ïa kaei kaba ki la ïakren bad u Myntri Rangbah, kynsan kynsan napdeng ki paidbah ki bym hun ïa kaba mih na ka jingïakren bad u Conrad, ki la kawang maw sha ki Pulit bad shaphang ka ophis u CM bad nangtei ka la mih ka jingïakawang maw markylliang hapdeng ki paidbah bad ki Pulit haduh ka por mynmiet.
U Myntri Rangbah, u la ïathuh lyngba ka Video ba wat lada kine ki Sengbhalang ki don tang ar ne lai tylli, hynrei u la pyllait por ban leit ïakynduh bad ki, wat lada ki dang don bun ki Sengbhalang na Garo Hills ki bym pat don lang ha kane ka jingïakhih. Ha kane ka jingïakren u la batai ïa ki halor ki kam pynroi kiba ka sorkar ka la leh na ka bynta ka Garo Hills. Na ka bynta kine ki jingdawa, u Myntri Rangbah, ula ong ba un sa pynlong biang ka jingïakynduh ha Shillong, ha kaba un khot lang ïa baroh ki Sengbhalang bad kiwei kiwei de ki kynhun.
U Conrad u la ïathuh ba shuwa ban wai ka jingïalang, u la ïoh sngew ïa ka jingïahylla shabar bad u la phah ïa ki nongïalam Sengbhalang ban leit peit bad ban pynsngewthuh ïa ki paidbah. U la ong ruh ba katkum ka jingïathuh ki nongïalam ka ACHIK, kine kiba la thaw jingkulmar kim dei satia ki briew kiba ju don ha kane ka jingïakhih kaba mam la ka sngi, hynrei kidei kiba ki dang ïohi mynta hi ka sngi bad kiba bun imat kidei kiba na shabar. Don ruh napdeng jong ki, ula ong ba la ïathuh da ki nongïalam Sengbhalang ba kidei kiba la shongshit kyiad.
Na ka liang jong u Myntri Rangbah, u la kular ban ai jingïarap 50 hajar tyngka sha kito kiba la mynsaw lyngba ka MLA Scheme jong u bad u la ong ruh ruh ba ki Pulit ki la ïoh ring video ïa kito kiba la thaw jingkulmar bad ka aiñ kan leh ïa kaba donkam na ka bynta jong ki.
Katkum ki khubor kiba la ïoh la ong ba ka jingshisha na ka liang ki nongïalam ka ACHIK kila sngewhun ïa kane ka jingïakren bad u Myntri Rangbah bad pdiang ban bteng ïa ka jingïakren ha Shillong.