Mih ïarap ot kba ki paid Karbi ïa ki Nongrep Pnar ha Lapangap wanphai biang ka jingïadei

Shillong, Risaw 21: Kum ka dak ban pyni ba ka shongsuk shongsain bad ka jingïalong marjan kaba ia sngewthuh jingmut hapdeng ki paid Karbi bad ki paid Pnar ba sah ha Lapangap ka la mih ka jingïatreilang hapdeng ki Shnong ba marjan. Mynta ka sngi ki nongrep Pnar na ka shnong Lapangap, West Jaintia Hills, kila ïoh ïa ka jingïarap na ki Nongrep Karbi ha ka jingot ïa u kba na ki lyngka, kaba pyni ïa ka jingwan phai biang ka jinglong jingman ba jai jai ha ka thaiñ hadien ka jingïakynad dang shen.
Ka video bala ai da ki bor District ka pyni ïa ka jingjia kaba pynsngewtynnad, kaba pyni ïa ka mynsiem ka jingïatreilang hapdeng ki ar Jaidbynriew.
Kane ka jingïarap kala wan jur hadien ka jingtuklar jong u Myntri Rangbah ka Jylla, u Chief Executive Member (CEM) ka KAAC bad ki Nongïalam Shnong.
U Superintendent of Police ka West Jaintia Hills Jagpal Singh Dhanao, ula pyntip ba ka jingdon jong ki Pulit kan dang ïai bteng hapoh ka thaiñ ban ai ïa ki lad jingïada bad ban khanglad ïa kino kino ki briew ne kynhun ba nabar ba kin wan pynthut ïa ka suk ka saiñ.
Ki bor Pulit kila ai ka jingïaroh ïa ka jinglong ïai shah bad ka jingkiar ban leh ïa kino kino ki kam ba lah ban pynheh ïa ka jingjia da ki nongshong shnong ka Lapangap.