Mih ïakhih ki samla sha surok bym lah pyndap ka tnad Pulit ïa ki Post naduh u snem 2019

Shillong, Naitung 20: Ki samla wad kam kiba la aplai ban ïoh rung kam ha ka tnad pulit kiba ka tnad pulit, ha kaba ka la khot naduh u snem 2019 ha ka sngi Balang jong ka 20 tarik Naitung ki la mih sha surok ban dawa na ka tnad pulit bad na ka sorkar jylla ba ka dei ban pynbna noh ïa ka risol ka kaba ka tnad ka la pynlong ïa ka Written Test ha u bnai Rymphang mynta u snem.
Haba kren bad ki lad pathai khubor ki sama kiba la pynlong ïa ka jingïakhih da kaba ki sdang da ka jingïaid paidbah na Malki bad pynkut pat ha khmat u Mot jong u Kiang Nangbah ha Barik ki la pynpaw ba kane ka jingpynslem ka sorkar ban pyndep ïa ka jingthung kam wat hadien ba ki la dep ïa ki eksamin kiba donkam, kan pynlong ba kin tam wat ka rta kaba ka sorkar ka buh ban ïoh rung kam Pulit.
Kine ki samla ki la dawa ba ka sorkar ka dei ban pynbna ïa ka risol jong ka eksamin kaba ki la ïakhun namar ka pynlynga mynsiem ïa kiba bun shaphang ka lawei wad kam wad jam jong ki
“Ngi pas ne pheil ngin hun wei ba la ïoh ïa ka risol” pynpaw kine ki samla.
Shuh shuh kine ki samla ki la ïathuh ba ka jingïakhih jong ki kam dei satia ba ki don kano kano ka jingïakhih pyrshah ïa ka sorkar hynrei tang ban pynpaw ïa kaei kaba ki dawa kaba shong nia shong aiñ.
Kat kum ka jingïathuh jong kine ki samla ki ong ba ki post kiba ka sorkar ka thmu ban pyndap kat kum ka jingpynbna kaba ka la khot ka long malu mala kumba 800 eiei.