Mih ïaid Rally ki nonghikai JHLPSTA ha Jowai ban pyrshah ïa ki rai sorkar ki bym ïahap

Jowai, Nailar 18: Ki nonghikai skul Deficit hapoh ka lama jong ka Jaiñtia Hills Lower Primary School Teacher Association (JHLPSTA) da ka jingïasnohktilang bad ka All Meghalaya Primary School Teachers’ Association (AMPSTA), mynta ka lah sngi U Blei kila pynlong da ka jingïaid Rally ba jai jia, kala la sdang naduh madan Marian bad ïaid lyngba ka Iawmusiang ban pynkut ha Madan Jrisaleiñ da kaba pynlong ïa ka jingïalang.
Kane ka jingïaid Rally ka long shi bynta ban pyrshah ïa ka jingthmu jong ka sorkar ban pyntreikam ïa ka skim Meghalaya Education Grant (MEG) da kaba ki pynsngew ba kane ka lah ban ktah ïa ka lawei jong ki nonghikai ki ban shimti ha ka jaka jong ki. La dawa jur ïa ka sorkar ba kan pyndap noh ïa ki kam nonghikai kiba dang sah thylli ym ban pynshateng da ki 3 ne 4 snem.
Na ka liang u General Secretary ka AMPSTA ma F.C. Shullai ula pynsngew ba ka seng kala ïeng pyrshah ïaka order jong ka sorkar na ka bynta kito ki nonghikai hapoh ka Grant-in-aid (GIA) kata ban pynshong thaid ïa ki hapoh 58 snem ka rta bad ïa kane ka jingdawa na ka liang ka sorkar kala weng noh ïa ka order.
Shuh shuh ula pynsngew ba ka seng ka pyrshah jur ha kaba ïadei bad ka Memorandum of Understanding (MoU) kaba la ïasoi hapdeng ka sorkar bad ka Mother’s Union haka 19 tarik u bnai June ha Tura, ka seng kala kynnoh ïa ki ophisar jong kane ka tnad pule puthi kiba dei nabar ka jylla bad kiba la thaw ïa ki kyndon ban pynklumar ïa ka rukom treikam jong ki nonghikai bad ïa kane ka sorkar kala postpone shwa na ka bynta ban aiti ïa ki 20 tylli ki skul ha Tura sha ki riew shimet (Company).
Bad kaba lai ka long kum ka seng kila dawa ban pynïoh noh ïa ka Arrears D.A jong ki nonghikai Deficit kala long 46 % bad 49% ha baroh ka jylla, da kaba pynlong khnang ïa ka Rally kaba jai jai mynta ka sngi.
Shuh shuh u ma Shullai ula kyntu jur ïaka JHLPSTA kaba la seng naduh u snem 1980 bad mynta kala ïaid lynti la 45 snem, ba kan trei shitom ban pyndep ïa ka kam kaba dang sah kata ban shna noh ïa ka ophis treikam la jong.
Na ka liang ka All Meghalaya Primary School Teachers’ Association kan pynlong ïa kane ka juh ka Rally ha Tura ha ka 20 tarik bad kumjuh ha nongbah Shillong haka 22 tarik hashwa ban poi ka jingïakhih lada ka sorkar ka ïaid laid ïa ki jingdawa ba donkam kum ki nonghikai.
Kiwei de kiba ai jingkren ha kane ka sngi ki kynthup ïa u President ka JHLPSTA ma Lukas Jat, ma H. War u Secretary na Amlarem Unit, ka kong Vegonia Nongpluh General Secretary ka AMPSTA, kong Daribha Symrem Joint Secretary AMPSTA bad kiwei de kiba la pynsngew ïa kitei ki mad jingdawa ba donkam, ha ka juh ka por la dawa ruh ban pynïoh la ka jong ka CPF Account Number bad ban long ki kiba ïatylli lang kawei kum ki nonghikai Deficit.