Nongpoh, Nailar 20: Naduh ki paidbah nongshong shnong, ki khynnah skul, ki nonghikai lem bad ki nongtrei ka koit ka khiah kila mad shisha ïaka jingeh ba khraw bad syrtok haka leit ka wan ha kawei ka shnong khappud jong ka Meghalaya bad Assam kaba don ha Ri-Bhoi District namar ka jingjot rathai bad ka jingsniew shaba palat u surok u ba dei u budlum ka roi ka par khamtam ha kum kane ka por lyiur ba jur slap kaba la pynthud ïaka leit ka wan ki paidbah.
U tei u surok u dei na Amdubighat sha Amphreng ba jngai kumba 2 km eiei, hynrei ki paidbah jong ka shnong Amphreng kila mih da u shnong mynta ka sngi ban pynbha bad ban maramot hi namar ka jingmatlah bad ka jingbym phaikhmat jong ka sorkar ban pynpoi ki kam pynroi sha ki shnong khappud, bad kum ki paidbah kila sngew dukha mynsiem ban ap sah ïaka sorkar haduh ba kim banse ban mih paidbah lut mynta ka sngi ban shna pynbha hi.
Kum ki paidbah, bad wat ki nonghikai skul, ki nongtrei ka koit ka khiah kila pynpaw ka jingsngewkhia halor ka jingleh meinah ka sorkar bad wat u nongmihkhmat ka Mawhati ba ki paidbah ha katei ka thaiñ ki hap ban ïaid da ka khohruh khohram, bad kaba sngew sangsot ka long ba wat ki khynnah skul ki hap ban mad ka jingeh kaba khraw ban poi sha skul namar ka jingktieh bad sniew u surok.
Namarkata naka liang ki paidbah kila kyrpad sha u MLA ka Mawhati bad kumjuh ruh ka sorkar jylla ba ka dei ban phaikhmat ban pynpoi ki kam pynroi sha katei ka thaiñ naka bynta ka jingbit jingbiang lang jong ki paidbah khamtam haka thaiñ khappud bad ka Assam.
Ki la pynpaw ruh, ba ka jingeh kan dei ia ki paidbah bad khamtam eh ia ki khynnah skul, kiba la hap ban iaid kjat lyngba ka surok kaba sniew tasam, kata haba ki leit skul na Amdubighat sha Amphreng.
