Khliehriat, Nailar 16: Ha ryngkat bad ka ri India hi baroh kawei, hynnin ka sngi ha East Jaiñtia Hills District ruh la rakhe pyndonburom ïa ka sngi laitluid ka ri ka Independence Day kaba 75 ha Khliehriat, ha kaba u myntri sorkar uba dei ruh u MLA ka thaiñ, u bah Kyrmen Shylla u la wan ban pynher ïa ka lama ka ri bad leh ïa ka Rashtriya Salute ïa ka parade jong ki 26 tylli ki contingents ba kynthup ka contingent jong ka tnat pulit (MLP), ka NCC, scout and Guides lem bad ki skul bapher bapher kiba don hapoh ka district.
U bah Kyrmen Shylla, u la pynsngew ïa kiba bun tylli ki skim kynthup ki skim surok kiba la lah ban pyndep bad kiba dang pyntrei hapoh ka constituency bad kiwei kiwei ki skim kiba dang pyntrei bad kiba dang bud dien kiba long na ka bynta ka jingbit jingbiang ki paidbah u la pynsgew da kaba ong ruh ba “kaba sngewtynnad ban pynsngew ba na ka liang ka tnat P.H.E kaba la ai ka jingiarap ha kaba ïadei bad ka um bam um dih, ki don ki skim kiba naduh kito ki por jong ki MLA ba don burom kiba ha kito ki por, da kaba burom ïa ki ba ha kito ki por ki don ki project kiba dang sahteng, da kaba burom ïa ka sorkar MDA ruh ba ka la pyllait ïa ki mang tyngka ban pyndep ïa ka skim kum ka Greater Rymbai Water supply Scheme kaba la ïoh haduh T66 klur tyngka, kumjuh ruh ka Synrang Umlawe Project kaba dei ka project sam um bam”
U bah Kyrmen Shylla u la sam ruh ïa ka khusnam sha u Principal of Cham Cham Secondary School, u bah Riyo Phawa namar ka jingnoh syniang ha ka thoh ka pule, ïa ka khusnam la ai ruh sha ka Chiehruphi Secondary School, Holy Trinity Secondary School, K. B. Memorial Secondary School, Little Star Secondary School, Ladrymbai, Narpuh Modern Secondary School, Sacred Heart Secondary School, Byndihati, Sanshnong Secondary School, bad Wapung Higher Secondary School na ka bynta ka jingpass bha ki khynnah kaba 100 percent ka jing pass ki khynnah ïa ka exam Secondary School Leaving Certificate(SSLC) Examination 2022, u tei u myntri ka sorkar jylla u la ai ruh ka khusnam sha ka shnong Mukhaiñ halor ka jingnoh syniang ha kaba tehlakam ïa ka jingsniew u drok hapoh shnong, la ai ruh da ka khusnam Kayakalp Award ïa ka Pamra-Paithlu PHC, ka Rymbai PHC bad ka Sutnga CHC halor ka jinglah ban kyntiew ïa ka khuid ka suba kaba long ha ka rukom kaba ikoit i khiah bha.
Ia ki khusnam la ai ruh ïa u bah Edigio Paia Shylla uba na Sacred Heart Secondary School, Byndihati uba la rung ha ka kyrdan kaba 16th ha ka SSLC Examination, 2022, kumjuh ruh ïa ka kong Graceful Manar kaba na Saipung C&RD Block bad ka Sanjan Chyrmang kaba na Wapung C&RD Block kiba la noh syniang ha ki kam kiba ïadei bad ka koit ka khiah, kumjuh ruh ïa ka khusnam la ai ïa i kong Aihun .K. Lyngdoh Tron, iba dei ka nongpathai khubor lane ka Correspondent jong u Mawphor bad Highland Post East Jaiñtia Hills District kaba la noh syniang ha ka kam pathai khubor, ïa ki khusnam la ai ruh ïa ka shnong Umkyrpong bad ka shnong Ratacherra kiba dei ki shnong ba ym don ki khynnah kiba ha ka kyrta 6 haduh 14 snem ki ban pep skul shiteng por, la ai khusnam ruh ïa ka shnong Khahnar bad ka shnong Moolamylliang kaba la ioh 100 percent ïa ka Institutional Delivery, kumjuh ruh ka shnong Samasi, Tuber Kmaishnong bad ka shnong Natborkiba la kynjoh ïa ka 100 percent ha ka jingai injek lane ka Routine immunization Coverage hapoh ka District.
Nalor ka parade, la don ruh ki jingshad, ki skit, ka jingshad tynrai na ka Biate Youth Welfare Association, ka jingshad waitlam bad ka stieh na ki khynnah jong ka Children Home boys, la pynbyrngia ruh da ki nong ñiah motor bike na ka Eastern Motocross Sports Club of Meghalaya.
Ha ka march- past, ka skul Oxford Secondary School, Ladrymbai ka la rah ïa ka nam lah duh bad ka skul Morning Glory Secondary School, Ladrymbai ka long ba ar, la sam ruh ïa ki prize sha kitei kiba jop ha ka march-past bad kiba jop ha ka cultural prokram.
