Mih ar-kynhun, khluit puk ka jingïalang kam shnong Baridua, ym phah ïa ka rai sha Hima Mylliem

Nongpoh, Jylliew 07 : Ka Shnong Baridua mynta ka sngi ka la pynlong ïa ka jingïalang paidbah na ka bynta ban ïa kren ïa ki kam shnong ki kam thaw, khamtam ïa ka kam rangbah Shnong ba la shu thung mynta la bun snem tang da u Acting Rangbah Shnong bad ha kane ka jingïalang la shim bynta naduh ki Rangbah, ki Longkmie bad ki Samla ha kaba la khluid pynban ka jingïakren ïa ka kam rangbah Shnong bad ha kaba khatduh ym shym la lah ban shim rai satia ban jied ïa u rangbah Shnong ba thymmai bad kin sa phah pat ïa ka rai sha ka Hima Mylliem ban shim ïa ka rai kaba khatduh.
Ki phang ba hakham tba la ïa kren ha kane ka jingïalang ka long ban kyntu ïa u Acting rangbah Shnong lem bad ka Executive Committee ba dei ban pynlong noh ïa ka jingïalang jied rangbah Shnong, ha kaba ïa kane ka shnong Baridua ba hap ha ka Raid Marwet la 7 snem ei ei la shu thung tang da u Acting Rangbah Shong ban synshar ïa ka shnong ka thaw khlem da u rangbah shnong ba pura.
Kane ka jingïalang ka la khluid bha ka dei hadien ba la mih ar kynhun, kawei ka kynhun ba kyrshan ïa u Acting rangbah Shnong bad kawei pat ka kynhun kaba la kwah ban jied noh da u Rangbah shnong ba thymmai lane u Rangbah Shnong ba pura katei ka shnong.
Kumba la pynpaw ruh da ki riew rangbah ka shnong hadien ka jingïalang, la ïathuh ba lyngba kane ka jingïalang ba la shim bynta da ki paidbah ban ïa kren halor ki kam shnong kam thaw., ym shym la lah satia ban shim ïa knao kano ka rai bad kum ka shnong ki hap ban shim da ka rai ban phah noh ïa ka rai kaba la mih na kane ka jingïalang sha ka Hima Mylliem khnang ba kan lah ban shim ïa ka rai kaba khaduh halor ka kam rangbah shnong ba la shu thung tang kum u Acting rangbah shnong bad ban ioh noh da u Rangbah Shnong ba pura.
Shuh shuh, ki la pynpaw ruh, ka sur kaba mih na kane ka jingïalang kiba kham bun hi ki la kwah ban pynlong noh ïa ka jingïalang jied rangbah shnong, bad ka jingangnud ka long ban ioh noh da u Rangbah Shnong ba pura ban peit ban khmih ïa ka shnong ka thaw bad ym shuh tang u Acting rangbah Shnong.