Shillong, Nailur 19: Ka Ri-Bhoi District Sports Association kaba la pdiang ïa ka Shillong Sports Association hala ïing ban ïakhun hala ïing ha ka kyrdan U-14 bad U-16 jong ka Meghalaya Youth League 2024 ha Umdihar Mini Stadium ha ka Sngi Balang, ka la lah ban bteng ban ïai bat ïa ka kyrdan ba nyngkong ha ka Zone C.
Kine ki jingïalehkai ki dei ba la pynbeit ban pynlong ha u bnai ba la dep hynrei la hap ban pynkynriah noh.
Ha ka kyrdan ïalehkai U-14 la sakhi ïa ka SSA kaba la lamkhmat nyngkong lyngba ka kol na u Manjusna Kyrsian (21′) hynrei u Meland Mawiong (70′) u la pynïakhaid na bynta ka RBDSA.
Ha ka jingïalehkai kaba bud, ka SSA ka la ïoh ban lamkhmat da 2-1 kol haba kut ka kylla step hynrei u slap u ba jur u la pynlong ïa ka madan ban nym lah bteng ïa ka jingïalehkai bad la hap ban sangeh ha kaba baroh ar tylli ki kynhun ki la ïasam mar shi point.
Watla kata, ka resol jong kine ki ar tylli ki jingïakhun kim shym la pynkylla ïa ka kyrdan jong ki kynhun na ka Zone C, ha kaba ka Ri-Bhoi ka dang bteng ban lamkhmat ha baroh ar tylli ki kyrdan (U-14 bad U-16), katba ka SSA ka bud nadien ha ka kyrdan ba ar.
