Shillong, Nailar 18: Ka West Jaintia District Sports Association ryngkat bad ka Nongstoin District Sports Association ki la nang pynskhem ïa la ki jong ki kyrdan hala ki jong ki group ha ka lympung jong ka Meghalaya Youth League 2024 lyngba ka wat ïakhun ba san jong kane ka lympung ba la long ha ka Sngi Saitjaiñ.
Ha ka Zone B, ka West Jaintia ka la pynliem noh ïa ka Saipung Block Sports Association ha baroh ar tylli ki kyrdan, ha ka U-14 ka la jop da 9-0 kol bad bud sa ka U-16 da 2-0 kol, ha kaba u Kaisarmi Dkhar u la khyrwit da ka hat trick ha ka U-14, kaba dei ka sien kaba ar ïa u mynta ha kane ka lympung. Hadien ba jop baroh ki jingïalehkai ha baroh ar tylli ki kyrdan, ka West Jaintia ka la lamkhmat ïa ka Zone da 12 point.
Ka Amlarem Block Sports Association ka la ïai neh ha ka kyrdan ba ar ha baroh ar kyrdan da ka namjop ïa ka East Jaintia District Football Association da 7-0 kol ha ka U-14 bad da 2-0 ha ka U-16.
Haba phai sha ka Zone D, ka Nongstoin ka la pynliem ïa ka Tyrsad Area Sports Association da 5-0 ha ka U-14 bad da 5-2 kol ha ka U-16. Shuwa kane, ka Pyndengumiong District Sports Association ka dang lamkhmat ha ka kyrdan ba nyngkong ha ka U-14 hynrei ka jinglong jong ka suiñbneng la hap ban pynsangeh noh ïa ka jingïakhun pyrshah ïa ka Eastern Border Sports Association bad baroh ar tylli ki kynhun ki la ïoh ban khur mar shi point. Kumba ka long, ka Nongstoin ka ïoh 12 point katba ka Pyndengumiong 11 point.
Ha kawei pat ka jingïakhun na kane ka Group ha ka U-14 ka Mawkyrwat DSA ka la pynjemkhnap ïa ka Mawshynrut Sports Association da 7-0 kol.
Hynrei ha ka U-16, ka Mawshynrut ka la jop da 5-0 kol ïa ka Mawkyrwat. Ki kynhun U-16 jong ka Eastern Border bad ka Pyngdengumiong ki la ïohlad ban pyndep ïa ka jingïalehkai bad ïakhaid da mar 1-1 kol. Ka Nongstoin ka dang lamkhmat ïa kane ka thup da 13 point, bud sa ka Mawshynrut ha ka kyrdan ba ar da 8 point.
Na ka Zone A, ka District Sports Association North Garo Hills ka la ïakhaid da 0-0 bad ka Baghmara District Football Association ha ka U-14. Katba ha ka U-16, ka Williamnagar District Sports Association ka la jop da 4-2 kol pyrshah ïa ka Tura District Football Association. Ka North Garo Hills ka dang lamkhmat da 7 point ha ka U-14, katba ka Williamnagar ka lamkhmat ha ka U-16 da 7 point.
Khadduh, na ka Zone C, ka Shillong Sports Association ka la jop baroh ar tylli ki jingïakhun pyrshah ïa ka Riwar Mihngi Football Association, ha kaba baroh kynhun ki la jop da 5-0 kol. Ha ka U-16, ka Sohra Sports Association ka la mad ïa ka namrem da 0-4 kol ha ka Western Ri-Bhoi Sports Association.
Ka Shillong ka dang ïaineh ha ka kyrdan ba ar da 3 point ha ka U-14 bad 6 ha ka U-16, kaba wan hakhmat dei ka Ri-Bhoi District Sports Association (7 point ha ka U-14 bad 10 point ha ka U-16), ka bym shym la ïakhun ha katei ka sngi.
