Meghalaya Games: Ka jingpynlut ha WJH kan kham duna haba nujor ha Tura-MSOA

SHILLONG, Jylliew 28: Ka Meghalaya State Olympic Association (MSOA) lyngba u Working President – Bah John F Kharshiing bad General Secretary-Bah Finely Pariat hynnin ka Sngi Palei (27 tarik Jylliew, 2024) ki la pynpaw ba ka jingpynkhreh ïa ka Meghalaya Games kaba hynriew ban long ha West Jaintia Hills ka la nang ïaid shakhmat.
Haba ïakren sha ki lad pathai khubor, na ka liang jong u Bah John Kharshiïing u la ïathuh ba ki nongïalam ka synjuk ki la ïoh ban leit jurip lai sien ïa ki jaka ha Jowai kiba ka synjuk ka ibit ban pynlong ïa ki jingïalehkai na bynta ka Meghalaya Olympic Games.
Kumban shu pynkynmaw, na ka liang jong ka MSOA ka la leit ban jurip ïa kiba bun ki jaka ha West Jaintia Hills, ka District ban sa ïoh pynlong ïa ka 6th Meghalaya Games ha kaba la ïa synranlang da ki District Sports Officers, ki enginer jong ka tnat Sports, ki nongïalam jong ki synjuk ïalehkai bapher bapher naduh ki President bad Secretary.
“Ka jingleit jurip jong ka synjuk ïa ka West Jaintia Hills, Ngi la shem ba kane ka District ka don shibun ki jaka ïalehkai kiba biang, kum ka Stadium, Indor Hall bad tang katto katne kiba hap ban pynthymmai bad shna kyrpang, bad lehse ka jingpynlut ka lah ban kham duna haba nujor ïa kaei kaba la pynlut ïa ka Meghalaya Games ba long ha Tura,” la ong u Bah John Kharshiïing.
Shuh shuh, na ka liang jong u Bah John Kahrshiïng u la pynshai ïa ka daw ba la pynlong ïa Meghalaya Games ha Tura ban kot haduh 23 klur ka jinglut ka dei namar ba dang duna ki jaka ban pynlong ïa ki jingïalehkai, bad don ruh katto katne kiba la tei thymmai, ba kynthup ïa ka Synthetic Athletic Track kaba nyngkong eh ha Tura bad ruh ka jingpynkhreh ïa ka PA Sangma Stadium ha ka sngi plie pyrda bad ha ka sngi kut.
Namar ba bun ki synjuk ïalehkai ki la dawa da ki jaka ïalehkai kiba heh bad ka jingduna jong ki Hall bad Stadium ban pynlong ïa ki jingïalehkai la hap ban wanrah da ki German Hangers, nalor kata, la hap ruh ban pynbit pynbiang ïa ki ïing basa na bynta ki nongïalehkai ban sah ryngkat bad ka bam, kaba la pynlong ïa ka jinglut ban kynjoh 23 klur, la pynpaw u Bah John F. Kharshiïing.
Hynrei haba phai sha ka WJH, kane ka thaiñ ka la don shibun ki jaka kiba biang ban pynlong ïa ki jingïalehkai, naduh ki hall, bad nalor kata, ki jaka ba la thmu pynlong ïa ki jingïalehkai ki ïajan kawei ïa kawei pat, bad kane kan kham pynsuk shuh shuh ïa ki nongïashimbynta.
Katba na ka liang jong u General Secratary-Bah Finely L Pariat, u la kyntu ïa ki synjuk baroh ba kim dei ban khmihlynti na ka sorkar ban pynlut kham bun namar kane ka dang dei tang ka lympung ïalehkai hapoh Jylla ym ban pynïa ryngkat bad ki lympung lehkai National.
Ha kane ka kynti ka synjuk ka la pynpaw ruh ba ka kyrmen ban kyntiew ïa ki jait jingïalehkai ha kane ka wat pynlong ba hynriew ïa ka Meghalaya Games.
Lah ban kdew ba ka jingkynthup ïa ki jait jingïalehkai bapher bapher ha ka Meghalaya ki la nang bun, ha kaba na ki 9 tylli ki jait jingïalehkai (Disciplines) ha u snem 2001 ba la pynlong nyngkong bad haba nujor ïa ka Meghalaya Games 2022 haduh 19 tylli ki jingïalehkai bad ha Tura ka la tam arshah, ha kaba ki la don haduh 23 tylli ki jait jingïalehkai.
Ha kane ka kynti ka synjuk ka khmihlynti ban kynthup 25 ki jait jingïalehkai kynthup ruh bad ki jingïalehkai tynrai.