Meghalaya Games 2022 : Rah nam lahduh ka WKH ha ka football ki kynthei, ka EKH jong ki shynrang

Shillong, Jymmang 06: Ka West Khasi Hills kala jop ïa ka nam lahduh ha ka football jong ki kynthei, katba ha East Khasi Hills kala jop lahduh ha ka liang ki shynrang ha ki jingïakhun final ha ka sngi kut jong ka lympung 4th Meghalaya Games 2022 .
Ka East Khasi Hills kala lah ban wanphai da kaba thep kol pyrshah ïa ka Ri-Bhoi ha ka jingïakhun final kaba la long ha SAI Centre bad khur ïa ka takma ksiar da kaba pynliem noh da 5-1 kol, bad ïa kitei ki san kol la thep da u Aenam Jyrwa bad u Badonlang Rapsang kiba la thep mar ar kol.
Katba ka West Khasi Hills kala khur takma ksiar da kaba pynliem noh da 3-0 pyrshah ïa ka EKH 3-0 ha ka jingïakhun final ha Madan Hen, Mawlai. Ka Rivilda Rynjah ka thep ar kol. Ka East Jaintia Hills kala jop takma rnong da kaba pynliem da 4-0 pyrshah ïa ka West Garo Hills ha ka liang ki kynthei bad ka West Jaintia Hills kala jop da 7-3 pyrshah ïa ka East Jaintia Hills.
Haba phai sha kiwei pat ki jingïalehkai, ki ar sngi ki jingïalehkai Golf la pynkut noh ha Shillong Golf Course. Da kaba ïoh rung sien ba nyngkong ha ka Meghalaya Games 2022, kila don shibun ki nongïalehkai tied golf kiba la ïashim bynta.
Ha ka liang ki kynthei ka Jyoti Agarwal ka jop ïa ka takma ksiar, ka Gunjan Singhania ïa ka takma rupa bad ka Ooma Tiwari Tariang ka jop takma rnong. U Anil Pargal u la jop ha ka liang ki senior, u Col Jagdish Singh ha ka kyrdan ba ar bad Dilip K Borah ba lai. Benu Malakar ïa ka takma ksiar, Hector Marweiñ takma rupa bad Billykid Sangma ïa ka takma rnong.
Ha ka kyrdan amateur la jop da Dr KI Singh, Gaurav Bajaj ha ka kyrdan ba ar bad S Khonglah ïa ka nam ba lai. U Jonathan Iawphniaw u khur takma ksiar ha ka kyrdan amateur, Jason Passah ïa ka takma rupa bad Shaurya Goenka ïa ka takma rnong.
Ha ka Badminton, kaba la pynkut ha Indoor Hall, NEHU ki arngut ki shijur ki rangïalehkai ka West Jaintia Hills ba kynthup ïa u Mebanker Shullai bad Gregor Passah kala long ka lahduh da kaba pynliem noh ïa ki shijur Rituraj Nag bad Kiefer Shullai ha ka jingïakhun final bala sakhi lang da u Commissioner & Secretary u Syed Md A Razi.
Ha ka ïalehkai ba para marwei la jop da u Nag, katba u Andrew Lotzem bad Elsarica Umdor kila jop ha ka ïalehkai mixed doubles. Ki arngut ki shi para ka Shagun Singh bad Shristi Singh kila jop lahduh ha ka women’s bad girls’ doubles. Ka Shristi kala jop lahduh ruh ha ka kyrdan women’s singles bad girls’ singles. U Cyrun Marak u la jop lahduh ha ka kyrdan boy’s singles bad u Jay Kshair bad Gaurav Singhand kila jop ïa ka doubles.
Ha ka Boxing, kaba la pynpep noh shwa ha ka sngi Palei na ka daw ka jingpynthut ha ki bor ka mariang, la ïoh ban pynkut noh ha ka sngi Thohdieng da ka jingïakhun final kaba la pynlong ha Community Hall, Mawlai Mawroh.
Ki nongjop ha ka liang ki shynrang ki long u Pynshailang Sohshang (46kg), Sanjeev Maskut (48kg), Prashant Dorjee (51kg), Batsilbert T Sangma (54kg), Sunil Limbu (57kg), Badonkupar Synnh (60kg), Baiamutlang Sungoh (63.5kg), Bhalang Shadap (67kg) bad Bolnas Sangma (71kg).
Ha ka liang ki kynthei ki long ka Bainlumlin L Nongpiur (46kg), Gracenylla Marbaniang (48kg), Rabiya Khan (50kg), Melina Basaiawmoit (52kg) bad ka Tredicia Lamare (54kg).