MBOSE SSLC 2026: Ka Pass percentage ka long 86.84%, kumba 42,000 ngut pass ki khynnah ïa ka exam

Shillong, Ïaiong 7: Ka Meghalaya Board of School Education (MBOSE) ha ka sngi Ba-ar ka la pynbna ïa ka result jong ka Secondary School Leaving Certificate (SSLC) Examination 2026, bad ka pass percentage ka long 86.84%, kaba duna khyndiat na ka 87.10% jong u snem ba la dep.
Ki don baroh 48,623 ngut ki khynnah ba ïaleh ïa ka eksamin, ha kaba 42,228 ngut ki la pass bha ïa ka, kynthup ïa kiba pass ïa baroh 6 tylli ki sobjek bad kumjuh ruh 5 tylli ki sobjek.Ka result ka pyni ba ki regular ki dang bteng ban leh bha, katba ki Regular-1 candidates ka pass percentage ka long 93.30%, bad ki Regular-2 candidates ki ioh 80.72%.Ha ka jingïapher, ki non-regular bad ki khynnah ba ïaleh private ki sahdien da ka jingjop kaba duna bha.
U Wangaal Lama jong ka Gorkha Pathshala Higher Secondary School, Shillong u la ioh ïa ka kyrdan ba nyngkong da kaba ioh 585 marks, kaba la buh ïa ka thong ha ka eksamin mynta u snem. U Vishal Kumar uba dei na ka Embee Rosebud Higher Secondary School, Tura u la bud marjan ha ka kyrdan kaba ar da kaba ïoh 576 marks.
Ïa ka kyrdan kaba lai la ïasam lang hapdeng ka Prajukta Roy na Seven Set Higher Secondary School, Shillong bad ka Prinita Das na Pechon A Sangma Memorial Police Public Secondary School, Tura, baroh arngut ki la ioh 575 marks.
Ha ka kyrdan kaba saw,ki don lai ngut ki khynnah – u Samdi Mukhim na ka St. Anthony’s Higher Secondary School, Shillong, u Nathanael Mantre Laloo na Seven Set Higher Secondary School, Shillong, bad ka Wandarihun Lyngkhoi jong ka Anderson Higher Secondary School, Nongstoin – kiba ioh 572 ka marks.
Ka Jenita Pator na Sawlyngdoh Higher Secondary School, Mowkaiaw ka la ioh ia ka kyrdan kaba san da kaba ioh 571 mark, kaba pyndep ïa ka thup top five rank kiba bat ïa ka kyrdan ba ha khlieh duh ha ka jylla.
Ha kaba ïadei bad ka jinglah ban leh bha mynta u snem ki khynnah shynrang ki ioh ïa ka pass percentage ka long 94.14%, katba ki khynnah kynthei ki ioh ka long 92.88.
Ha ka liang jong ki distrik, katkum ka result ba pynpaw ki jingpher ba jur ha ki thain.Ka West Jaiñtia Hills ka la paw kum ka district kaba la leh bha tam da kaba ka jingpass ka long 94.99%, bud sa ka South West Khasi Hills kaba 94.60% bad ka East Khasi Hills kaba 94.17%.Ka East Khasi Hills ruh ka dei ka bhah kaba heh tam jong ki khynnah kiba pass bun ha ka jylla.Ha kawei pat ka liang, ka East Garo Hills (72.33%), North Garo Hills (72.70%) bad South West Garo Hills (74.54%) ki la ïoh ïa ka jingïoh pass kaba duna tam.
Ka jingïanujor bad ki snem ba la dep ka pyni ïa ka jingkiew ha ka jinglah ban leh bha naduh u snem 2025, ha kaba ka pass percentage ka la kiew sha ka 87.10% na ki kyrdan kaba kham shapoh ha ki snem ba la dep.Ka result jong u snem 2026, kaba long 86.84%, ka pyni ba ka jinglah ban leh bha ki khynnah.