Mawkynrew Cup : Pynbam kput ka Jatah Nonglyer ïa ka Old Nongryngkoh, 2 kol khyrwit u Kitboklang ïa ka Nonghulew

By Mawphor Editor On Sep 22, 2022

Shillong, Nailur 21 : Ka lympung ïalehkai 3rd Mawkynrew Cup 2022-23 ka la ïaid shaphrang mynta naduh ka Zone 1 haduh ka Zone 4. Ha ka sngi Balang kadei jong ka Zone 4 ha madan ïalehkai kynjat bol ha Jatah ha kaba la ïoh ban pynïalehkai ïa ki hynriew tylli ki team.
Ha ka jingïalehkai kaba nyngkong ka la long hapdeng ka Nonghulew pyrshah ïa ka Mawdulop, ba ar hapdeng ka Jatah Nonglyer pyrshah ïa ka Old Nongryngkoh bad ka jingïakhun ba khadduh ka la long hapdeng ka Mynsang pyrshah ïa ka Umsawwar.
Haba phai sha ka jingïalehkai kaba nyngkong ka jingïalehkai ka long kaba mar ïakhaid bad dei tad haduh ka minit ba 40 shwa ban kut ka kylla step, ka Nonghulew ka la ïoh ban plie pyrda lyngba u Kitboklang Surong.
Ha ka kylla miet ka jingïalehkai ka la nang ïakhaid ha baroh arliang ha kaba ka Mawdulop ka la ïakhun tyngeh ban pynphai kol hynrei ka khlem lah pat ban pyndep ha ka liang ka thep kol.
Ka Nonghulew ka la nang ïoh mynsiem bad ïakhun tyngeh ha kaba u Kitboklang Surong u la ïoh ban thep sa ïa ka kol kaba ar ha ka minit ba 50 ha kaba ka kynhun ka la jop da 2-0 kol.
Ha ka jingïalehkai kaba ar hapdeng ka Jatah Nonglyer bad Old Nongryngkoh, ka jingïalehkai ka kham lah shilliang ha kaba ka Jatah Nonglyer ka la ïoh ban pynbam kput da 7-0 kol. Ïa ka kol kaba nyngkong ka Jatah Nonglyer ka la ïoh ban thep ha ka minit ba 9 lyngba u Nickelsen Bina, bud sa ka shi kol na u Daky Mukhim ha ka minit ba 11, u Martin Mukhim ha ka minit ba 16, u Winjestar Nongbri ha ka minit ba 18 bad u Baristar Nongbri ha ka minit ba 40.
Baroh kitei ki saw kol ka Jatah Nonglyer ka la thep ha ka kylla step. Katba ha ka kylla miet ka la biang ban thep sa 2 kol lyngba u Winjestar Nongbri ha ka minit ba 55 bad khadduh na u Kowelson Bina ha ka minit ba 60.
Ha ka jingïalehkai kaba khadduh, ka la long hapdeng ka Mynsang pyrshah ïa ka Umsawwar ha kaba ka Mynsang ka la jop salit 1-0 kol. Ïa katei ka shi kol la thep da u Alninton Mukhin ha ka minit ba 38 jong ka kylla step.
Ha kitei ki jingïalehkai la sakhi lang ki nongkitkam ka MCC bad ki paidbah.