Nongpoh, Naiwieng 23: Kum ka dak ka jingpynrem jur ïaka jingjia ha Mukroh, hadien ba 5 ngut ki mynsiem briew kila duh noh ïala ka jingim hadien ka jingsynreit kuli jong ki pulit Assam, ki 4 tylli ki kynhun sengbhalang ba kynthup ïaka KSU, RBYF, FKJGP bad HNYF mynta ka 23 tarik Naiwieng kila pynlong ka jingteh lama iong ha kylleng ka dong Ri Bhoi naduh ki rud surok, ki kali kamai, ophis sorkar bapher bapher bad wat ki kali pulit bad kali sorkar.
Ïa katei ka jingteh lama iong la pynlong ha kylleng ki jaka ha Ri-Bhoi bala sdang naduh Umiam, Umsning, Nongpoh, Byrnihat shaduh Khanapara bad ki thaiñ Western Ri-Bhoi ban pynpaw ïa ka jingsngewsih jur, halor ka jingduh noh ïa 5 ngut ki mynsiem naka jingdusmon jong ki pulit Assam kiba la shu synreit kuli im im peit peit sha ki paidbah ha katei ka shnong haka jingjia kaba la jia haka step jong ka 22 tarik.
Haba kren sha ki lad pathai khubor naka liang ki nongïalam jong kitei ki 4 seng ha Ri-Bhoi ba kynthup ïa u Bah Ferdinald Kharkamni President ka KSU, Bah Bipul Thangkhiew President ka RBYF, Bah Luistar Lyngdoh President ka FKJGP bad u Bah Marcus Marten President ka HNYF kila ong ba kum ki nongïalam seng ki dap da ka jingsngewkhia kaba jur bad pynpaw ka jingsngewsih halor ka jingkhlad noh 5 ngut ki mynsiem ba lui lui naka jingdusmon ki pulit Assam bad kum ka dak ka jingsngewlem bad sngewsih kila pynlong ka jingteh lama iong ha kylleng ki jaka jong ka dong Ri-Bhoi, naduh ki ophis sorkar, ki kali kamai, ki dukan bad kum ki paidbah kila ai ka jingïatreilang ha katei ka sngi.
Kila ong ruh ba lada ka pulit ka jylla ki tieng ban leit sha khappud ban leit ïakhun bad khamtam ban ïada ïaki khasi ba shong ba sah ha katei ka thaiñ, ai hangi ki tiar bad ka bor ngin leit ban ïakhun hi sha khappud.
Kitei ki nongïalam seng kila ther tyngeh ruh ïaka sorkar jylla ba kum kine ki jingjia baroh ka dei ka jingpheil ka rukom treikam jong ka sorkar bad khamtam u Myntri kam pohiing ka jylla kaba la pyntlot ruh ïaki pulit ka jylla haka rukom treikam.
Shuh shuh kila pynkynmaw ruh ïaki jingjia bala dep ban jia naduh Langpih ha kaba 4 ngut ki mynsiem briew kila duh noh ïala ka jingim bad kine ba mynta 5 ngut sa katno ngut ki mynsiem ba lui lui kin dang ïap la buh jingkylli kitei ki nongïalam seng da kaba pynkynmaw ruh ïaki jingjia haka thaiñ Umlaper, Block II ha kaba ki pulit Assam ki ju wan leh donbor naka por shaka por haduh bala pynlong ïaki pulit ka Meghalaya ban phet krad na katei ka jaka khlem da pyndonkam ïaki tiar siat watla ki don, bad hato kane ka jingphet jong ki ka dei ka jingkhawpud ne ka jingburom ïaka Assam ka shong haka tnad pulit ban jubab, hynrei haba ngi phai haka jingjia ba Mukroh ka jingsiat ki pulit Assam ka dei ka jingdusmon ïaki paidbah ba shong ba sah ha khappud ka jylla.
Kum ki nongïalam seng kila phah ruh ka kyrwoh kaba shai sha ka sorkar jylla ba kum ki nongïalam seng kin nym shong kli kti halor katei ka jingjia bad kin shong da ka jingïalang ban shim ïaki rai nangne shakhmat.
