Shillong, Nailur 04 : U Myntri Rangbah ka Jylla, Conrad K Sangma ha ka sngi Palei u la kynduh ïa u Myntri Kampohiing ka Ri u Amit Shah ban kyntu pynstet noh ïa ka ishu Inner Line Permit (ILP) kaban khanglad ïa ka jingïoh rung kyrthlep ki mynder na Bangladesh lyngba ka khappud Meghalaya.
Ha kane ka jingïakynduh u Myntri Rangbah u la kyrpad ruh ïa u Myntri Kampohiing ka Ri ban ai noh la ka jong ka Meghalaya Cadre, nangta ka jingai jingithuh noh ïa ka Ktien Khasi bad Garo ha ka Khyrnit kaba Phra jong ka Riti Synshar jong ka Ri bad khamtam eh ban ai kyrteng noh ïa ka surok ha Delhi ha ka kyrteng u (L) Purno Agitok Sangma.
U Myntri Rangbah u la pynkynmaw ruh ba ka Iing Dorbar Thawain ka Jylla ka la dep ruh ban mynjur ïa ka Resolution bad phah ruh bun tylli ki dorkhas sha ka sorkar pdeng ban pynïoh noh ïa ka ILP ha Meghalaya.
“Nga la pynkynmaw ïa u Home Minister sa shisien pat, da kaba buh hakhmat ïa ka jinglong jngman ka shilynter khappud bad ki jingjia ba harukom kiba jia ha ka ri ba marjan. Kumta da kaba buh hakhmat ïa kine ki jingjia baroh, ka long kaba donkam ban pynkhlain ïa ka jingdon ki bor pahara ha khappud, bad ruh ban don shuh ka lad jingïada kaban tehlakam ïa ka jingïoh rung ki mynder sha ka jylla Meghalaya,” u la bynrap biang.
U Myntri Rangbah u la ong ruh ba ka lad kaba ki don mynta kadei beit sa tang ka ILP bad dei halor kane ka bynta ba u pynjur ka jingdawa ïa u Myntri Kampohiing ba un bishar bniah bha ïa kane.
Haba ïadei bad ka Ktien Khasi bad Garo, u Conrad u la ong, “Sa shisien pat nga la pynkynmaw ïa u Home Minister ba ngi la dep ban mynjur da ka Resolution ha Iing Dorbar bad bunsien ruh ngi la phah ïa ki dorkhas ban kyrpad ïa u ba un tuklar lang na ka bynta ban ithuh noh ïa ka Ktien Khasi bad Garo ha ka Khyrnit kaba Phra.”
Katba halor ka jingtyrwa ban don noh la ka jong ka Meghalaya Cadre na ka Joint Cadre jong ka Meghalaya bad Assam kaba don baroh shi katta, u Myntri Rangbah u la ong, “Kumba phi tip, ngi don ïa ka Joint Cadre jong ka Meghalaya – Assam bad ym don shuh kiwei pat ki jylla ha ka Ri kiba don ïa ka Joint Cadre bad kumta, nga kyrpad ïa u Myntri Kampohiing ba lada lah ban pynïakhlad noh ïa kane ruh ka Meghalaya kan long ka jingmyntoi kaba khraw ïa ka Meghalaya.”
Ha kawei pat ka liang, u Conrad u la kyrpad ruh ba ïa ka surok ha New Delhi ban ai kyrteng noh ha ka kyrteng jong u (L) PA Sangma kum ka jingpynsah nam ïa ka jingnoh synniang jong u ïa ka thain shatei lamihngi jong ka ri, ki riewlum bad ruh ki ritpaid.
