Shillong, Naitung 01: Hadien khyndiat taiew ka jingkhihwin ka surok Nongpoh-Umden-Sonapur, na ka liang u MLA ka Nongpoh Bah Mayralborn Syiem ha ka sngi Nyngkong u la leit ban kynduh biang ïa u Myntri Rangbah ka Jylla, Conrad K Sangma ban buddien biang halor ka jingphah shna noh ïa katei ka surok.
Haba kren bad ki lad pathai khubor, u Bah Mayralborn u la ong ba ka jingkynduh ka long kaba seisoh naba na ka liang u Myntri Rangbah u la kular ban shimkhia ïa katei ka jingkyrpad ban phah maramot ia ka surok Nongpoh-Umden kaba 20 Kilometer ha ka jingmang kaba 52.98 klur tyngka.
U Bah Mayralborn ula ïathuh ba ïa ka Surok Nongpoh-Umden kaba dei ka Intermediate Road, yn pan pisa na ka tnat Ministry of DoNER ka Sorkar Pdeng katba na Umden sha Sonapur kaba jngai 38 km kan dei lyngba ka skhim PMGSY.
Haba kylli halor ka jingslem ban ïoh ïa ka mang tyngka, utei u MLA ka Nongpoh u la ong, “Ka jingmang tyngka ka ïaid na ka tnat sha ka tnad Planning nangta sha ka NEC bad ter ter sha ka Ministry of DoNER, bad hadien ba la ïoh mynjur na ka DoNER yn sa lah ban pyntrei ïa ka surok.
Shwa kane, u MLA u la ong ba ka jingbuddien khah khah ïa kane ka surok kadei namar u kwah ba ka thaiñ kan shah jied shwa naba ki don bun kiwei pat ki surok kiba donkam ha ka jylla kiba kwah ban ïoh shwa ma ki.
