Markhmat bad u Defence Minister pan u CM ban ai noh ïa ki jaka shipai sha ka sorkar

Shillong, Naitung 06 : U Myntri Rangbah ka jylla, Conrad K Sangma hynne ka sngi u la pyntip ba u la dep ban ïa kren markhmat bad u Myntri ka tnad Ïada Ri jong ka Ri, u Rajnath Singh na ka bynta ban ai noh ïa ki jong ka Cantonment sha ka sorkar jylla.
Haba kren bad ki lad pathai khubor, u Myntri Rangbah u la ïathuh ba ki don ar bynta haba ïadei bad ka jaka Cantonment, kata kawei kaba dei ka jaka ba don ki shipai (military zone) bad kawei pat kadei ka jaka ba sah ki paidbah (civil zone).
“Ka jingïakren halor kane ka bynta ka la ïaid shakhmat bad ka sorkar India na ka bynta ban aiti noh ïa ki jaka ba ha ha ka civil zone jong ka Cantonment Board sha ka Municipal Board. Kane ka kam ka la ïaid shajrong bad ngi khmih lynti ba ka sorkar India kan ai ïa ka jubab kaba sngewtynnad,” u la ong.
Nalorkata, u la ïathuh ruh ba ka jaka ka don kumba 40 akar ei ei kaba ïadei bad katei ka bynta katba ka jaka jong ka Cantonment pat ka don kumba 400 akar hynrei kiba bun ki dei beit ki jaka ba don ki shipai. “Hynrei ngam da kynmaw bha ka lah ban dei 200 ne 400 tangba 10 persen na kaei kadei ka jaka ba shong ki paidbah,” ong u Myntri Rangbah.
Halor ka jingkylli, u Myntri Rangbah u laong ruh ka shong mynta ba kumno ka Rules ka ong. “Kam dei shuh mynta kaei kaba nga kwah lane kiwei ki kwah hynrei ka shong ha ka Rule bad ha ka sorkar India bad ka Defence Ministry kaei ka jingbthah ki ai.”