Mardor yn khot ïa kren ka UDP ïa u Bah Embhah, yn khroh ban wanphai biang

Shillong, Naitung 30 : Ka United Democratic Party (UDP) ka la pynkhreh ban khot ïa kren mardor bad u Bah Embhah Syiemlieh, MLA barim ka Mawlai hadien ba u la pynbna ban mih noh na ka party ryngkat bad ki spah ngut ki nongkyrshan jong u.
“Mardor ngin khot ban ïa pynbeit ïa kane ka kam. La kumno kumno ha kane ka sngi Nyngkong hi,” ong uwei na ki nongïalam ka party.
Na ka liang ka party, ka la pynkhreh ruh ba kin pyrshang ban pynsngewthuh ïa u Bah Embhah ba un weng noh ïa katei ka rai ban iehnoh ïa kane ka party khamtam ha kum kane ka por ba ka elekshon ka sah sa kumba san bnai ei ei.
Kumban shu kdew hangne ba ha ka janmiet sngi Thohdieng utei u MLA barim ryngkat bad ki spah ngut ki nongïalam jong ka UDP Mawlai ki la pynbna ba ki la resaiñ paidbah na ka UDP halor ka nongrim ba ki nongïalam ba thymmai ki la shu ïaid lait lut ïa ki nongïalam ba rim.
Ha katei ka jingïalang kaba long ha iingsah jong u Bah Embhah hi ha Mawlai, ki la shim ruh ïa ka rai ba ïa mynta hi kin ym pat leit ban ïasoh ne kyrshan ïano ïano hynrei ïa ka rai kin sa shim ha ka jingkynduh biang kaban sa long shen.
Tangba kaei kaba ki pynpaw ka long ba kan ym lah shuh ban long ba kin sei kyrtong hynrei ki lah ban shu leit kyrshan noh ïa uno uno u kyrtong uba ki sngew ïahap bad pdiang lang ïa ki jingtyrwa ba kum ki nongïalam ki buh.