Shillong, Jylliew 11 : Ka jingjot ka surok Jowai by-pass tang hadien shi sngi ar sngi ba la dep ban maramot ïa ka, kala pynlong ïa ki nongïalam ka Hynniewtrep Achick National Movement (HANM) Jaiñtia Zone, ban jurip ïa ka long ka man jong ka mynta ka sngi hapoh ka jingïalam jong u President jong ka u bah Shaniah Suchen.
Ha kane ka jingjurip ka Seng kala lap ïa ka jingshisha ïa ka jingjot ha ki ba bun ki bynta wat tang shi taiew ruh ym pat don ba la dep ban maramot ïa ka, kane ka la pynlong ka jingsngewlyngngoh ïa ki nongïalam jong ka HANM.
Na ka liang u President ka HANM Jaiñtia Zone u bah Shaniah Suchen, u la ong ba kane ka jingpyntrei ne maramot ïa ka ne ka surok ka long kaba shu trei tangdep rukom ne ki shu pyntrei da kaba pyndonkam da ki mar kiba long ki bym bha, ne la shu trei tangdep tang ban ïoh ïa ka nong khlem da pyrkhat ïa ki paidbah. U bah Suchen u la kyntu jur ïa ka sorkar ban phah maramot biang ïa kane ka by-Pass ha u contractor ba pyntrei ïa kane ka surok bad dei ban ai ruh ka hukum ban trei bha bad lada un trei kumjuh hi dei ban pynshitom ïa u.
Shuh shuh na ka liang u bah Suchen u la pynpaw ruh ka jingsngew nguh ïa ka ïingbishar Meghalaya High Court kaba la phah ïa sorkar Jylla ban maramot ïa kane ka surok, hynrei kaba sngewsih ba ki nongpyntrei ne ki contractor pat ki shu trei tangdep tang ban myntoi ïalade khlem pyrkhat ïa ka jingbha jingmiat jong ka imlang sah lang. Namar lada ka surok Jowai By-Pass kan bha kan miat kan ïarap shibun ban pynduna ïa ka jingsahkut kali ha nongbah Jowai.
Sa kawei ruh kane ka by-pass ka dei kaba pyndonkam da ki jylla bapher bapher jong ka thaiñ shateilam mihngi. Na ka liang ka seng ka la ong ba lada ym pynbha ïa kane ka surok katkum ba dei na ka liang jong ka seng kan sa leit ujor biang sha ka ïing bishar High Court jong ka jylla.
