Nongstoiñ, Naiwieng, 27: Ka jinglong jingman jong ka surok Maweit ha kine ki sngi ka la sniew palat, kat haduh ba ki kali rit kiba ïaid bad ba ju kit ïa ki paidbah lyngba kane ka surok ki la shem shitom shibun.
Halor kane ka bynta na ka liang ki nongïalam ka FKJGP Maweit Circle, ha ka sngi palei ki la leit ban buh jingthoh hakhmat ka tnad jong ka PWD ban maramot (repair) ïa kane ka surok. Namar katkum ka jinglap jong ka seng kane ka surok bna nam, ka la jot bad la sniew haduh katta katta.
Kumba long mynta ka la buh jingeh haduh katta katta ïa ka leit ka wan jong ki paidbah ka thaiñ Maweit baroh kawei, khamtam eh kiba pang ba shitom ha kaba katno ka long kaba I sangsot ba kin mad ha kum kane ka por. Kumta ka seng ka da kyntu jur ïa u EE PWD ban ïarap katba lah na ka bynta ka bha ka miat jong ki paidbah ka thaiñ.
Ïa kane ka surok ym don ba peit ba khmih shuh kat haduh mynta lait noh ki muster roll, hynrei naka daw jong ka jingsniew kaba la palat pud jong ka surok na ka liang ki muster roll ruh kim lah shuh ban pynbha. Kumta ka Seng ka la kyrpad ïa u EE ban phai khmat lem ïa ka dong ka thaiñ Maweit.
“Hooid wat la ngi la bna paidbah ba kala don ka jingthmu ban shna pynbha noh ïa ka surok Nongstoiñ Maweit. Hynrei ngim tip pat haduh lano lah ban sdang, te khnang ban lait na ka jingeh jingjynjar jong ki paidbah, ngi kyntu ïa u EE ban phah maramot malu mala, khnang ba ka ïaid ka ieng kan long kaba kham suk bad ban wanrah ïa ka jing myntoi ïa ki paidbah ka thaiñ”, ong ka kyrwoh na u Bah Anthony Umiong President FKJGP Maweit Circle bad Bah Endry Ryntong General Secretary Maweit Circle.
