Shillong, Jylliew, 18: Namar ka jingsngewkhia ïa ka jingjulor jong ka surok kaba la jot na ka daw ka jingksam jong ka um na ka jingther jong u lapbah lapsan ha kine ki khyndiat sngi mynta ka taiew, ki dkhot jong ka Mylliem Youth Congress ha ka sngi Saitjaiñ ki la maramot ïa ka surok ha Lad Umdiengpun, 7 Mer, Upper Shillong.
Ki dkhot jong ka seng hapoh ka jingïalam jong u President u Samla Pynsuklang Nongkhlaw ki la pyndap khyndew ïa ki thliew ki syar ha kane ka surok kaba la buh jingeh ïa ki paidbah nongshong shnong jong kiba bun kiba ïaid lynti kane ka surok kaba la pynsalia bad pynartatien wat ïa kiba bun ki kali kamai ne ki kali jong ki riewshimet kiba ïaid sha ka thaiñ Upper Shillong bad sa kiwei pat ki kali kiba wan na ka thaiñ Sohra bad na kiwei pat ki District jong ka Jylla.
“Kane ka dei ka surok kaba pynïasoh ïa ki shnong sha ka thaiñ sepngi, ka thaiñ Sohra bad Pynursla bad ka dei ka surok kaba la pynthud bha ïa ka ïaid ka ieng jong ki paidbah bad ïa ki kali. Kaba isangsot haba don kiba pang ba shitom ka pynthud bha namarba ka jingdheng kali ruh ka jur,” ong u President ka Seng u Samla Pynsuklang Nongkhlaw.
“Na ka jingdheng kali, lah ban duhei wat ka mynsiem briew, ngim lah ban tip ïa kata. Kum ka Youth Congress ngi la shim ïa ka rai ban maramot pynbha ïa kane ka surok hadien ba mynta la jan shi bnai ka jingsniew jong ka surok,” u la ong.
Dei na kane ka daw ba ngi la shim ïa ka rai ban leh hi dalade, u la bynrap.
“Ha ka jingshisha ngi ap ïa ka kompeni ïoh ba ka pynbha ïa kane ka surok hynrei ïohi pynban ba ka Kompeni kam don shuh bad ngi shim rai hi dalade ban pynbha ïa kane ka surok,” u la ong.
Ha kane ka sngi, la sakhi ba ki dkhot ka seng Congress ki la kit ïa ki maw bad u shyiap ha ki trok rit ban pyndap ïa ki thliew ki syar kiba la pei hapdeng ka surok kaba la khoh na ka daw ka jingther jong u lapbah uba jur.
