Nongstoiñ, Naitung 15: Ki paidbah jong ki lai tylli ki shnong ka Nongtrai Sepngi jong ka thaiñ Langdongdai, ha ka sngi hat majai ki la ïa mih paidbah ban maramot hi ïa ka surok kaba la jot, kat haduh ba ka la pyndik haduh katta katta ïa ka leit ka wan ki paidbah nongshong shnong.
Ryngkat ki tiar kum ki mohkhiew, ki lyngka bad ki kali ban kit maw, ki paidbah nongshong shnong naduh Mawsmai haduh Malangkona, ki paidbah ki la ïa mih ryntih naduh ka por 9 baje ban maramot ïa ka surok kaba 15 kilometer.
Ha kane ka jingmaramot ka la mih shim bynta lang ruh da ki riew rangbah naduh ki sordar shnong, secretary shnong bad ki riew paidbah haduh ban pyndep kata haduh ka por 4 baje nohphai sngi.
Na ka liang u Assistant Secretary ka shnong Nonghawei, u la ong ba kane ka surok ka long kaba donkam namar ka dei u budlum ïa ka khaïi pateng bad ka leit ka wan haduh 21 tylli ki shnong.
Ki paidbah shnong naduh Mawsmai, Mawkhar, Nonghawei bad kiwei kiwei ki shnong, ki dei kiba im ha ka rep ka riang. Kumta donkam ban pynbha ïa ki surok kali khnang ba kan pynsuk ïa ki nongrep ha ka khaïi pateng bad ka surok ba bha kan kyntiew ruh ym tang ïa ki nongrep, hynrei ka long kaba donkam kyrpang ïa kiba pang ba shitom.
Na ka liang ki riew rangbah ki la pynpaw ruh ka jingdiaw mynsiem namar ka jingbym shimkhia jong ka sorkar MDA ba la ïalam da ka NPP. Kumta ki sngew ban kyntu sha ki bor sorkar, ka tnad PWD bad khamtam ïa u MLA, ba un phai khmat bad sngew lem halor ka jingeh ki paidbah ha kaba ïa dei bad ka leit ka wan, da kaba pynïoh noh ïa ki surok rong kiba bha kumba ïoh lem kiwei pat ki para nongshong shnong hapoh ka Jylla.
