Nongstoiñ, Lber 16: Ha kine ki bnai ba la dep ki ki dur khih bad ka jingkynthoh na ki paitbah ki la saphriang sted bha lyngba ki rynsan social media, ba ka sorkar Assam ka la sdang ban shna da ka surok ar laiñ na Kamphaduli sha Langpih, kaba la sdang ruh ban pynkhih win ïa ki paitbah nongshong shnong bad ki sengbhalang jong ka West Khasi Hills.
U nongthoh khubor haba hiar ban peit ïa ka jinglong jingman bad ka jingpyntrei ïa katei ka surok, la lap ïa ka jingshisha ba kam dei satia ka jingpyntrei surok, hynrei ka sorkar Assam ka shu phah maramot bad pynbha ïa ka surok kaba rim kata ïa kiba la phah shna da ka dewbilat, khnang ba kan ym don jingthud ha ka por lyiur bad ba ka surok kan neh kan skhem bha. Nalor kata la lap ruh ba ha ki bynta jong ka surok ki byn don kam ban shna bha ïa ki nala um ka la shu iehnoh kumto.
Ha kaba ïadei bad ka jingpynsaphriang ïa ki khubor hamsaïa la ïoh ban ïakren bad kiba bun ki riew rangbah ka thaiñ Langpih, ha kaba ki la pynpaw ïa ka jingbym sngew tynnad namar ba ka jingpynsaphriang ïa ki khubor hamsaïa kiba ïadei bad ki shnong khappud, khlem da wad bniah ïa ki jingshisha ka long ka bym lah ba pdiang, namar ka lah ban wanrah ïa ka jingbym shngaiñ ha ka imlang sahlang bad kan ktah ïa ka shong suk shong saiñ ha ki shnong khappud khamtam eh ha ka thaiñ Langpih.
Nalorkata, ki la ong ruh ba ki don shibun ki briew kiba wan sha katei ka thaiñ ban pynsngewthuh bakla ïa ki paitbah nongshong shnong, ha kaba ïadei bad ka jinglong trai ïa ka khyndew ka shyiap bad ki jaka puta ha ka thaiñ khlem da tip ïa ka nongrim bad ki jingshisha.
Kumta kitei ki rangbah ki la kyntu ïa ki paitbah ba kim dei ban shah ïalam bakla ha ki briew kiba na kiwei pat ki jaka. Namar watla ki kam ba ki dei ki trai shnong ne ki trai jaka kim lah satia ban shim jingkitkhlieh lada jia ki jingeh ïa ki trai shnong.
