Mar shimti kum u LO khyrwit u Dr Mukul halor ka jingkynnoh ba jur ka kam khaïi dewïong bad drok

Mar ïa shimti kum u nongïalam liang pyrshah, U Mukul Sangma, uba dei u dkhot uba rim tam jong ka Ïing dorbar jylla bad kum u Myntri Rangbah barim, ula shim shwa ïa kawei ka rai bad kata ka long, ban ujor beit beit sha ka ophis u Myntri Rangbah duh pyrshah ïa U Ma Sniawbhalang Dhar, Symbud Myntri Rangbah ka sorkar jylla, namar ba ula shah thad madan ha U Ma Vincent Pala, MP barim ka jylla, halor ka jingdonkti jong u, ha ki kam shalan tuh dewïong bad ha ka jingkhaïi drok ruh kumjuh.
Haba ïakren ïa kane ka mat, ka wan ka jingkylli, ba kumno ba U MP jong ka seng VPP, uba jop halor kane ka ishu bamsap bad ban wanrah da ka CBI, ba kan tohkit ïa ki kam bam klop jong kane ka sorkar MDA, ba u shu sngap man man bad ba um nud ban saham, wat tang shi kyntien ruh ha Lok Sabha halor kata ka jingbamsap jong kane ka sorkar bad ula dei ban dawa ïa ka CBI bad ka ED, ba kin wan kem briew sha Shillong; hynrei kaba lyngngoh ba ïa katei ka mat, hap ban shim pynban, da U MLA, uba u pud treikam jongu, ka dei tang hapoh ka jylla.
Haba ïakren ïa kane ka mat, ka dei ruh ba u paidlang ka jylla, un ai burom ïa ka Congress bad ka TMC, kiba dei ki seng kiba ïar jingmut, namar ba ki la pyndem ïa la ka jong ka jingsngew meng halade, ban ïoh ïa u nongïalam liang pyrshah ha ka dorbar jylla; katba kiwei pat ki kob sob bad ki kwah ban pharia ïa ki liang pyrshah, ba kin nym lah satia, ban ïatreilang bad ban buddien bha ïa ki jingtreikam jong ka sorkar MDA bad kane ka jingbym ïa beit, ka paw pynban, kumba ka don ka jingleh mynleh, da kaba ïa sylla napoh napoh bad ka sorkar jong U Conrad Sangma, na ka bynta ban pharia ïa ki liang pyrshah bad ba kane ka sorkar, kan leh katba mon.
Ka jingkyrshan jong U Mukul Sangma, ïa ki jingkren jong U Ma Vincent Pala, ka pyni, ba ka don kano kano ka daw, kaba don jing shisha bad ka dei na kata, ba u sa nud ban shim rai, ba un ujor shaduh ka ophis jong u Myntri Rangbah duh ka Ri.
Lada la ïakren halor kane ka mat, la ïohi shai ruh, ba wat u Ma Sniawbhalang, haba ula shah kynnoh shimet, hynrei u shim sting ia katei ka jingkynnoh, da kaba kynthoh kylla, ba ka seng Congress, ka la jot thiaw hapoh ka jingïalam jong U Ma Pala bad katei ka jubab, ka ïapher hapdeng ka jingjot jong ka politic bad ka jingjot jong ka jingim shimet jong u briew bad lada u kwah ban sait khuid ïalade, ula dei ban ujor beit beit ïa katei ka kam ha kashari bad ba ka kashari, kan rai ruh ban khot ïa ka CBI lane ka ED, ba kin tohkit halor katei ka jingshah pynbudnam jong u ha u riew rangbah, uba la long U MP jong ka Shillong watla hadien na ka liang u Bah Sniawbhalang Dhar u la phah ruh da ka legal notice ban dawa da ka bai mynraiñ khmat kaba T. 100 klur na u Bah Pala.
Ka jingshimti jong U Mukul Sangma, kum u nongïalam liang pyrshah, kan pyni ïa ka dur ka dar, kaba khlaiñ jong ki liang pyrshah lane kaba u shait ong U Rahul Gandhi, ba ki liang pyrshah ruh, kin trei ïa la ka jong ka kam ban pynïaid ïa ka sorkar lane kaba ki ong shadow Government bad ka la dei ka por, ïa U Mukul, ba un tih tyllong noh ïa kito ki skhim ot ribon, kito ki skhim sam ei bad nangta kaba i shyrkhei sat, ka dei ïa ka jingkynting jong ka ram, ha kaba ka sorkar India (la imat) kumba kam ai eiei shuh ïa kane ka sorkar, hynrei, ka la shu ailad ba kan leit beh ram na ki Bank bapher.
Haba ïa kren ïa kane ka mat, la hap ruh ban khyllie, ba kumno ka kynhun jong U Bah Prestone Tynsong, Ma Sniawbhalang Dhar, ba ki ïa tei pop ha ki rynsan elekshon, ha u snem 2018, ïa ka jingbamsap bam klop jong ka sorkar U Mukul Sangma bad la shu sngewthuh hi ha kito ki por, ba ka tang shu wan ka sorkar NPP, la kumba kin shu pynshong patok shirta ïa U Mukul Sangma, mynta ki la don hynriew snem, hynrei, tang ïa kawei ka tyrsim kjat jong U Mukul Sangma ruh kim lah ban pynhab bad katei ka shu pyni shai toi, ba kitei ki sahbiej bad sah anna, hakhmat ka ryngïeng rynïot jong U Mukul Sangma bad dei na kata ba haba kim nud ban khyllied ïa la ki jong ki ñiuhmat ha khmat ka main rangbah jong utei u rangbah, ba ki sa mih ban leh mynleh bad leit thad burom sha surok khlem ki daw kiba dei hok.