Shillong, Nailar 12 : Ka kynhun ïalehkai jong ka Langsning bad Mylliem ki la mad ïa ka nam ïakhaid kaba mar 1-1 kol ha ka lympung ïalehkai jong ka Shillong Premier League kaba long hynne ka sngi ha madan SSA Stadium ha First Ground, Polo.
Ha ka jingïakhun dei ka Langsning kaba ïoh ban pynkhih jar nyngkong ha ka minit kaba 48 kaba wan ha ka dur jong ka kol kaba bakla thep hi sha kol la jong hashwa ba u Miliancy Khongstia un pynïakhaid na bynta ka Mylliem ha ka minit kaba 75 jong ka jylla miet.
Wat hapdeng ka jingther u slap hynrei ka jingïakhun ka ïai bteng tad haduh ban da kut ka por ïalehkai.
Kane ka dei ka sien kaba nyngkong na ka bynta ka Mylliem ban aireng ha ka Shillong Premier League hadien ba ka la kiew kyrdan na ka First Division 2024. Haba phai pat sha ka Langsning, kane kadei ka kynhun kaba la ïoh ban rah haduh arsien ïa ka nam lahduh ha kane ka lympung.
Na ka liang ka Mylliem ka la mih madan bad ka kynhun kaba kynthup bun bha ki rangïalehkai kiba tbit kum u Milancy bad Alem Khongwir, Freestar Kharbangar, Shaibor Nongrum bad Remark Kharmalki.
Haba phai sha ka jingïakhun, la ïohi bad sakhi ruh ïa u Alem uba la pynshongshit bha ïa ka jingïalehkai khamtam ha ka jylla step. Nalorkata la ïohi ruh ïa ka jinglah jong u Dajied Wanshning uba ka Langsning ka la pynneh naduh ka samoi 2024 uba la ïoh ïa ka lad ban pynsyier ïa ka liang pyrshah lyngba ka bol kaba u la khyrwit jam tangba dei ryngkhat ba kane ka bol ka leit takhuh noh ïa u rangap dien ka Mylliem bad kane ka bol ka la pynkhih ïa ka jar.
Ha ka kylla miet dei ka Mylliem kaba la ïalehkai bha tangba kam shym la lah ban thep kol watla ka ïoh bun bha ki kabu ksiar. Tangba khatduh hi ka ïoh tang shi sien ban pynkhih jar ban pynïakhaid ïa ka jingïalehkai.
Ka jingïakhun mynta ka sngi Balang pat kan long hapdeng ka Laitkor pyrshah ïa ka Malki ha ka por 5:30 baje janmiet.
