Shillong, Jylliew 23: U Myntri ka tnat Pule puthi ka sorkar jylla u Rakkam Sangma ha ka sngi Nyngkong u la pynshai ba ka jingai ïa ka Umbrella Scholarship na ka bynta ki samla pule ST la leh sam lyngba ki installment khnang ban pynthikna ba kan dei ban don ka jingsam kaba ïa ryngkat hapdeng baroh kiba dei ban ïoh ki jingmyntoi. Na ka liang ka ministry ka la dep ban pyllait ïa ka installment ha ka wat kaba nyngkong, bad ïa ka pisa yn phah sha ki bank account na ka bynta ki samla pule lyngba ki kyrdan kyrdan.
Haba kren shaphang ki jingeh halor ka pisa scholarship, u Sangma u la batai ba mynshwa ka ministry ka shait pyllait pura ïa ka pisa sha ki 20,000 ngut ki samla pule, katba kiwei pat kiba sah kumba 40,000 ngut kin hap ban ap ïa ka installment ka ban wan. Hynrei ha kane ka kynti na ka liang ka ministry ka la rai ban sam ïa ka scholarship kajuh ka pisa na ka bynta baroh da ki installment.
U Myntri u la pynbiang ruh ki jingtip ba biang ha kaba ïadei bad ka Chief Minister’s Scholarship Scheme, da kaba ong ruh ba ka jingpynbna halor kane ka scheme yn sa pyntip bad pynmih. Shisien ba la sdang ki samla pule kin ïoh T. 6,000 na ka CM’s scholarship scheme, nalor ka Umbrella Scholarship ba la ai da ka Tribal Ministry ka sorkar pdeng.
U Sangma u la pynthikna ruh ba ka jingsiew ïa ka scholarship yn pyndep ha ki 2 ne 3 tylli ki installment. Ha kawei ka liang u la pynpaw ruh ba kumba 6,000 haduh 7,000 hajar ngut kiba dei ban ïoh jingmyntoi ki don jingeh haba ïadei bad ki bank account jong ki, kaba lah ruh ban pynslem ban ïoh ïa ka pisa scholarship.
Na ka liang u Myntri u la kyntu ïa ki samla pule ba kin pynthikna ba ki bank account jong ki kin dei kiba la update bad kiba pynïasoh bad u Aadhaar ban lait na kino kino ki jingeh haba ïadei bad kane ka kam.
