Mar ïasdang snem thymmai ïohkem ki Pulit WJH 19 ngut ki Nongtuh scooty bad thuk thuk kurup 37 tylli

Shillong, Kyllalyngkot 18: Ki Pulit ka West Jaintia Hills ki la pynkhlaiñ ïa ka jingtreikam jongki hadien ba la jur palat ka jingshah tuh ki scooty bad thuk thuk ha kylleng ki bynta ka jylla bad da kane ka jingtrei shitom mar ïa sdang une u snem ba thymmai kata ha ka 16 bad 17 tarik Kyllalyngkot 2026 ki la ïoh ban kurup 37 tylli ki arshaka bad ïoh kem haduh 19 ngut ki nongtuh kiba donkti ban thuh ia kine ki ar shaka kylleng ki jaka. Kat kum ka kyrwoh ba pynlait da ka Ophis u Superintendent of Police ka West Jaintia Hills, kala don ka jingkiew ha ka jingtuh ïa ki thuk thuk bad ki scooty ym tang ha West Jaintia Hills hynrei ha kiwei ki District jong ka Jylla ruh kumjuh.
Ha ka jingïaleh kaba jop, ki Pulit kila ïoh ban bat shwa ïa lai tylli ki arshaka ha ka jingtalasi kali bala pynlong ha Lad Demthring ha ka miet 16 bad 17 tarik Kyllalyngkot 2026. Ki nongñiah jong kine ki kali arshaka kila pyrshang ban phet na kane ka jaka talasi kali bad kyntait ban sangeh, kaba lam sha ka jingkthong kaba jur hashuwa ba kin ieh ïa kine ki scooty bad thuk thuk bad phet ïalade sha khlaw.
Ha ka jingkhynra kaba jur, ki Pulit kila ïoh kem ïa uwei na kine ki runar uba la tip kyrteng kum u Meshanki Langstang, ïa kaba ki Pulit ki ong ba u dei u briew uba ju donkti ha ki kam tuh thuk thuk. Ki Pulit kila kem ïa u bad wanrah sha Jowai Police Station ban nang tohkit shuh shuh.
Ka jingkhein ki Pulit ka ïathuh ba hapdeng ka 1 tarik Kyllalyngkot, 2025 haduh mynta, la ïoh ban pdiang haduh 41 tylli ki jingujor ba shah tuh ki arshaka hapoh ka District, ïa kaba 37 tylli lah rejister da ka case.
Da ka jingtrei shitom ki Pulit, baroh 37 tylli ki arshaka lah ïoh ban kurup biang bad la pynphai pat ïa ki sha ki trai hadien ki jingpynshisha baroh.
U SP ula pynthikna ba haduh 19 ngut ki briew kiba donkti ha ki kam tuh arshaka kila shah kem bad mynta kine ki runar ki la don hapdeng ka jingshah tian bishar kat kum ki kyndon ain.
Haba pynmih ïa ka jingbthah, ki Pulit ka WJH kila kyntu ïa ki nongshong shnong ba kin peitngor bha bad shim ïa ki lad jingïada, kynthup ka jingpynïeng ïa ki kali ha ki jaka kiba shngaiñ bad kiba meh light, pyndonkam ïa ki steering lock bad kiwei ki kor ïada kum ka GPS system bad kiar ruh na ki jaka pynïeng kali ba kynjah khamtam ha ka por mynmiet.
La kyntu ruh ïa ki paidbah ba kin pyntip mar mar lada don kano kano ka jingshah tuh lane ka jingishankhmat sha ki Police Station ba marjan da kaba phone ha u nomber 112.