Shillong Jylliew, 23: Ka Kong Phidalia Toi ka la pyntip ba kan sa iehnoh ïa ka kam Chairperson jong ka Meghalaya State Commission for Women (MSCW) hadien ba ka la mih ka jingïashrut bad u Myntri ka tnat Social Welfare ka Sorkar Jylla u Bah Paul Lyngdoh.
Ha ka jingïakren bad ki lad pathai khubor ha ka sngi Thohdieng ka Kong Phidalia Toi, ka la ïathuh ba ka la ïoh jingtip halor ka jingshah weng jong ka na ka shuki Chairperson jong ka Meghalaya State Commission for Women (MSCW) tang na ki lad pathai khubor bad hadien ar tylli ki kyrwoh khubor ba la phah sha ki lad pathai khubor, ka Sorkar ka la pan jingpynshai na ka lyngba ka Show Cause Notice.
Ka la ong, hadien ba ka la phah ïa ka jingpynshai sha ka Sorkar bad hadien katto katne por kan sa iehnoh ïa kane ka shuki da kaba ïasyllok shwa bad ka nongsaid-aiñ jong ka.
“Hadien ba ka Commission ka la phah ïa ka jingpynshai, u (Bah Paul Lyngdoh) u dang ïai leh kuman da kaba kren sha ki lad pathai khubor ïa ka bymshisha.
“Ngam kwah shuh ban ïatrei lang ha kum kane ka kynrum kynram namarba kane ka jingïashrut kan wanrah tang ïa ka jingbymsngewtynnat bad nga ngeit ba kan jin da la bha ba ngan mih noh na ka bynta ka jingbha jong ka Commission bad ka bha ka miat jong ki kynthei. Ngan hap ban resaiñ bad ngan hap ban shim ïa ka rai kumno ban leh ynda nga la ïasyllok shwa bad ki Muktiar jong nga,” la ong ka Kong Phidalia Toi.
Haba kynnoh ba u Bah Paul Lyngdoh u la pyndonkam bakla ïa ka itkiar kum u Myntri Sorkar, ka Kong Phidalia Toi ka la ong, “Peit kaei kaba u Myntri u la leh nga tharai ba ka dei jingpyndonkam bakla ïa ka iktiar bad nga shim ïa kane kum ka jingpynïapher, ka jingñiew shiliang bad ngan sa peit kaei kaba ngan sa leh hadien kane.”
