Mar ar tylli ïoh ki MDC ka Liang Pyrshah ban buh jingkylli ha ka dorbar ba shi sngi

Jowai, Naiwieng 20: Ka Dorbar Tlang jong ka Jaiñtia Hills Autonomous District Council (JHADC) kala poi noh sha kaba kut mynta hi ka sngi Palei jong ka 20 tarik u Naiwieng, 2025, ïa kane ka Dorbar la pynïaid da u Chairman ka JHADC u Dr. Sankey Shangpung.
Ha kane ka sngi la ïoh ruh ban ïatai na ka bynta ka jingbha jingmiat jong ka Council lyngba ki Motion bala wanrah da ki MDC ka liang pyrshah kiba kynthup ïa u Bah M.B Rymbai, Bah A.A. Shullai (LO), Bah Jamshaphrang Pohtam bad u Bah Nehemaia Lamare.
Naduh kaba sdang jong ka Dorbar kala don ka jingïatai ñia da ki MDC ka liang pyrshah bad u Chairman ba pynïaid ïa ka Dorbar namar ka jinglyngkot palat jong ka por bad ka jingbym ïoh lad jong ki ban pynsngew ïa ki jingkylli kiba la buh baroh, hynrei na ka liang u Chairman ula ai lad ban bun jingkylli tang mar 2 tylli marwei.
U MDC ka 2-War Central, u Jamshaphrang Pohtam ula pynpaw ka jingkhluid da kaba kura syndon ïa ka miej bad tad haduh ba poi ka pali jong u ban kylli jingkylli ula sangeh noh ban ïashim bynta na ka bynta ban kylli ïa kitei ki jingkylli.
Mar ar tylli ki jingkylli la kylli da u Bah M. Rymbai ki long halor ka jingdon ki Gazetted Officers post hapoh ka Finance Department ka JHADC da kaba jubab da u CEM Bah Thombor Shiwat ki don ar ngut. Sa kawei ula buh jingkylli halor ka rukom ïakhun ïaka kyrdan Waheh Shnong katkum ka Jaiñtia Hills Autonomous District (Establishment of Elaka and Village Election Act 2015 Appointment, Power, Functions and Jurisdiction of Dolloi/Sirdar and Waheh Shnong) Atc 2015, na ka liang u CEM Bah Thombor ula pynsngew katkum ka aiñ jong ka JHADC la shah tang ïa u shynrang ban ïakhuh ïa ka kyrdan Waheh Shnong.
U Bah Daeimi Liam ula buh jingkylli ïa u Dolloi ka Elaka Labang Nongphyllut la thung da ka Council, la jubab da u CEM haoid la dep thung ïa u Acting Dolloi u Bah Prolin Samayang katkum ka Notification ha u snem 2023 la dep ban thung ïa u ha katei ka thaiñ. Kumjuh ruh ïa baroh ki shnong kiba hap hapoh katei ka Elaka la dep ban ai Sanad da ka Council.
Katba u Nehemaia Lamare ula kylli halor ka jingïateh sos kular hapdeng ka Council bad ka Earth Tree na ka bynta ka Agro Forestry Project ban thung dieng ha ki jaka lum ne ki them kiba syllen kiba don ha Ri-Lum Jaiñtia, ki jaka ba danghap hapoh ka jingpeit jong ka District Council, kaba la buh ïa ka por haduh 40 snem ban heh ban san kine ki dieng ban wanrah biang ïa ka jingjyrngam jong ka mariang ba ka jingïoh nong ïa ka Council.
Na ka liang u Soki Lapasam ula kylli katno tylli ki skul DCLP kiba mad jingeh ha ka jingduna ki nonghikai la jubab da ka EM kong V. Lyngdoh ki don haduh 8 tylli. Ha kaba ula pan jubab ruh halor ki lad ki lynti kiba la shim da ka Council ban pynbha pynmiat ïa kitei ki skul.
Ka kong Deiwipaya Tongper kala pan jingkheiñ haduh katno sien ka jingleit jurip ïa ki Trading License jong ki bar jylla naduh ka 1 april haduh 31 October 2025 ha East bad West Jaiñtia la jubab da u EM Bah J. Suiam la dep jurip haduh 15 siem 8 sien ha East Jaiñtia bad 7 sien ha West Jaiñtia. Kala pan jingtip halor ki jaka ba pynlong ïa ka jingleit jurip la pyntip da u EM Bah Jesse Suiam ki long kum ha Lumshnong, ha ki jaka ïew, Khliehriat, Lad Rymbai, Mihmyntdu bad kiwei de.
Ha kane ka Dorbar mynta ka sngi la leh burom ruh da kaba sngap jar shi minit halor ka jingkhlad jong u (L) Thomas Nongtdu (Ex MDC) bad ka jingaikhublei kitbok kitrwiang sha kiba ha ïing ha sem da ki para MDC hapoh ka Dorbar.
Na ka liang u CEM ula pynsngew ïa ka Report halor ka jingthung Chairman of Boundary Committee ïa u MDC Bah Mihnyngkong Sutnga bad u Honorary Forest Adviser ïa u L. William Theite (MDC).