Shillong, Jylliew : U MLA ka Mawlai u Bah PT Sawkmie ha ka sngi Saitjaiñ ba la lah u la sam ïa ka song pisa kaba mar san hajar tyngka sha ki 50 tylli ki Self Help Group kiba don ha Mawlai ki ba na Mawtawar bad kiba na Umsaw Mawjynrong, ka ba kot sha ka 2.50,000 tyngka baroh, kaba long kum shi bynta ban ïarap ïa ki ha ki kam jong ki.
Ha kane kajuh ka sngi u Bah PT Sawkmie u la sam ruh ïa ki tiar shet tiar tiew bad tyrpal sha ki saw tylli ki dong kiba don ha Mawtawar. Katba ha Umsaw Mawjynrong pat u la sam mar ar tylli ki tyrpal bad mar ar ki top syntek, na ka bynta baroh san tylli ki dong kiba don hapoh kane ka shnong.
Haba ai jingkren u bah PT Sawkmie u la ai jingmut ïa ki SHG ba ki lah ruh ban seng kum ki dukan Embroidery, kiba thaiñ oh shrong ïa ki jaiñ sem, ki dukan suh jaiñ, ki dukan khap shñiuh ne beauty parlour bad kiwei kiwei.
Na ka liang u MLA u da ban jur ba ki dei ban ïa tylli bad ban ïaineh ha ki kam ki jong ki kum ki SHG. U kyntu jur ruh ïa ki haba don eiei ne mad kino kino ki jingeh ban long laitluid ban pyntip sha u.
Ha ka jingïalang ba la pynlong ha Mawtawar la ïoh ïa ka jingkren na u secretary shnong bah Kynmaw Nongdhar, uba la pynpaw, haba phaidien, ka Mawtawar ka dei ka shnong kaba la rim bha bad da ka jingdon u nongmihkhmat kum jong u bah PT Sawkmie, shibun ki jingmyntoi ki la ïoh. U la pyrto ruh ïa u MLA ha kaba u la ong ba kane ka prokram kaba mynta ka sngi, lah ban ong ba ka dei ka jingtbit treikam jong u MLA, kaba u la siat shi maw ar tylli ki siem. “Nga nud ban ong kum u rangbah, ym don kum bah u bah PT Sawkmie ba trei shitom haduh katta katta na ka bynta ka bha ka miat jong ka Mawlai,” ong u secretary shnong.
Ha kane ki sngi la ïoh ruh ia ka jingkren na ki rangbah dong bad na ki nongïalam jong ki Village Organization (VO), kiba la ai khublei bad pynpaw ka jingsngewnguh ïa u MLA halor ka jingïarap jong u.
Ha Umsaw Mawjynrong la ïoh ïa ka jingkren na u rangbah shnong bah R. Mawthoh, na u bah Danny Mukhim, assistant Rangbah dong, uba dei ruh uwei na ki dkhot sengbhalang, uba la pynpaw bad ai khublei ba ki la ïoh diang dei por ïa ki tiar kum ka tyrpal bad ki top syntek, kiba u MLA u la ai sha ki.
Ha kane ka sngi la don lang ruh u Bah Homer Kharkongor, president ka UDP Mawlai Circle bad kiwei ki dkhot, kiba la ai ruh ïa ka jingkren jong ki.
