Mar 30 hajar sam u ma Wailadmiki Shylla sha ki 7 tylli ki jaka ri khunswet ha WJHD

Jowai, Naiwieng 12: U ma Wailadmiki Shyllai uba dei myntri ka tnad ka koit ka khiah bad ka kam ïalehkai Sports jong ka sorkar jylla, mynta ka sngi Balang 12 tarik u Naiwieng ula wan ban sam mar (30) laiphew hajar tyngka sha ki (7) hynñiew tylli ki jaka ri khunswet (Orphanage) kiba don hapoh ka West Jaiñtia Hills District.
La sam ïa kane ka pisa lyngba ka Cheque sha ki Superintendent jong kitei ki jaka ri khunswet hapoh ka District haka jingïalang bala pynlong ha Circuit House kaba don ha New Hills Loomsooïung Jowai.
Na ka liang u ma Wailadmiki Shylla haba kren sha ki lad pathai khubor ula ong ka jingsam ïa kane ka pisa ka dei lyngba ka tulop ba nyngkong jong u kum u Myntri Sorkar kaba la kynjop sha ka 2 lak 4 hajar tyngka shibnai bad ïa kane ula kular ban ai jingïarap naduh une u bnai bala dep.
“Kane ka dei ka jingsngewnguh jong nga ïa U Blei uba la theh ki jingkyrkhu ba ngan poi sha kane ka kyrdan Myntri sorkar. Nga pynpaw ka jingsngewkmen kaba khraw eh hadien bala ïoh ban sam ïa kane ka pisa kaba nga la dep kular, haoid kane kala dei ka jingai kaba rit jong nga”, la ong u ma Wailad.
Kum u Myntri u kloi ban ïarap ïa kitei ki jaka ri khunswet da kaba kyntu ïa ki ban wan mih sha ka ophis treikam jong u ha kano kano ka por na ka bynta ki jingdonkam haka imlang ka sahlang.
Kine ki jaka ri khunswet (orphanage) 7 tylli kiba don hapoh ka West Jaiñtia Hill ki kynthup ïaka ha Children’s Home Boys Chutwakhu Jowai, ka Children’s Home Girls Mihmyntdu, ka Specialize Adoption Agency Ladthadlaboh, ka NEIMA Boys Sahsniang, ka NEIMA Girls Sahsniang, ka Khasi Jaiñtia Presbyterian Wahiajer bad ka World Mission Nartiang.