Mano ban rung sha ka Quarter Final jong ka MSL 2024, mynta ka rai ïa kiwei ki kynhun

Shillong, Naiwieng 05 : Ka kynhun ïalehkai jong ka Nangkiew Shaphrang Lum diengngan ka la ïoh ban mad ïa ka jingjop kaba nyngkong ha ka lympung ïalehkai jong ka Meghalaya State League 2024 da kaba pynliem haduh 3-1 kol ïa ka Mawlum Tyrsad ha ka Group C kaba long hynne ka sngi ha Tyrsad.
Ha ka jingïakhun, dei ka Mawlum Tyrsad kaba ïoh ban thep kol nyngkong lyngba u Banshem Khongsit tang ha ka minit kaba 04 jong ka kylla step. Hynrei dei tang hadien ar minit, kata tang ha ka minit kaba 06 ba ka Lumdiengngan ka la ïoh ban pynïakhaid noh ïa ka jing ïakhun lyngba u Kitboklang Sohtun.
Ïa ki ar tylli kiwei pat ki kol jong ka kynhun la ïoh ban thep da u Pynkupborlang Kharbhih ha ka minit kaba 58 katba u Kitboklang Sohtun pat ula ïoh ban thep ïa ka kol kaba ar ha ka minit kaba 64 jong ka kylla miet.
Da katei ka jingjop, ka Lumdiengngan ka la kiew mynta sha ka kyrdan kaba ar ha ka miej ïa kheiñ point da ki 3 point. Watla ka ïa ryngkat ha ka jingïoh point bad ka Seven United hynrei ka la ïoh ban jam shakhmat da kaba ïapher ha ka jingïoh thep kol (kaba long 0 la -2). Kine ki arliang kin ïa kynduh ban tynjuh bor ha ka sngi Palei kaba dei ka jingïakhun kaba khatduh na ka Group kaban rai artad ïa ka lawei jong ki.
Ha kane ka samoi jong ka MSL, man kawei ka kynhun kaba wan ha khlieh duh na ki hynriew tylli ki group kynthup ïa ki ar tylli ki kynhun kiba wan hakhamt eh ha kyrdan kaba ar kin ïoh ban rung sha ka kylla kaba bud lane ka quarter final.
Kumba long haduh mynta hi tang lai tylli ki kynhun kiba la pyntikna ïalade ba kin rung sha ka ka Quarter Final. Kine ki kynthup ïa ka Ladthalboh na ka Group C, ka Shillong Lajong na ka Group E bad ka Mawlai na ka Group F.
Watla ki don ki kynhun kiba dang ïakhun ban ïoh ïa ka kyrdan kaba nyngkong na man la ki group hynrei don pat ka lad wat ïa kito ki kynhun kiba lah ban ïoh rung lada ki ïakhun tyngeh ha ka kylla kaba khatduh na ka thup kiba wan ha ka kyrdan kaba ar.
Ha kane ka sngi Balang, kin don sawtylli ki jingïakhun kaba dei ruh ka jingïakhun ba khatduh na ki group.
Kumta ha ka jingïakhun kaba khatduh ha Tura, ka Pinggera Do·gisik kan hap ban ïakhun pyrshah ïa ka Chipakkore ha ka por 5:30 PM baje ha PA Sangma Stadium. Ka Chipakkore (ka don mynta da ki 4 point) bad ka don ruh ka jingkyrmen ban kiew sha khliehduh jong ka Group A lada ka jop. Haduh mynta ka Lumsohkhlur ka la don ha khlieh jong ka miej khein point da ki 6 point katba ka Piggera pat ka don da ki 3 point.
Ha ka Group B pat ki don ar tylli ki kynhun kiba ïoh mar 6 point, kata ka Khliehmawlieh bad Sutnga watla ki don ka jingïapher ha ka jingïoh thep kol (+6 la +1). Hynrei lada jia ba ka Mawten (3point) ka jop pyrshah ïa ka Riangdo Youth, kumta ka jingïaknieh kaba itynnad bha ïa ka kyrdan kaba nyngkong.
Ha Khliehriat, ka Rymbai Skhenshynriah ka donkam ban jop da hynriew kol pyrshah ïa ka Mulait United ban tam ïa ka lahduh barim ka Rangdajied United ban poi ha ka kyrdan ba nyngkong ha ka Group D. Ka Rangdajied bad ka Rymbai Skhenshynriah ki la ïakhaid mar 0-0 kol bad ka RUFC mynta ka don da ki 7 point ryngkat bad ka jingïoh thep kol kaba long +10 katba ka Rymbai Skhenshynriah pat ka don da ki 4 point ryngkat ka jingïoh thep kol kaba long +5 kol.
Ha ka jingïakhun ha Shillong pat, ka Pynursla United kan hap ban ïakhun pyrshah ïa ka Mawmluh. Kine baroh artylli kin ïa knieh ïa ka kyrdan kaba ar. Tangba ka jingbym lah jongki ban ïalehkai bha ha ki jingïakhun ba la dep khamtam da ka jingïoh thep kol kaba long (-9 bad -14) ka pyni ïa ka dak ba ki don ha ka jingartatien ba kin lah ban rung sha ka quarter final wat lada ki jop ruh.