Mano ban rah ïa ka Shillong Premier League 2024?

Shillong, Lber 14: Ka rai mano ban ïohrah ïa ka nam lahduh jong ka OC Blue Shillong Premier League 2024 kan long mynta ka sngi ha ka jingïalehkai ba khatduh eh jong ka samoi, ha kaba ki paidbah nongkyrshan kiba ieid phutbol kin sakhi ïa ka jingïaknieh nam hapdeng ka Mawlai SC bad ka Shillong Lajong FC. Ka jingïalehkai kan sdang ha ka por 5 shiteng janmiet, bad yn pynïalehkai hapoh ki floodlight jong ka madan First Ground, ha SSA Stadium.
Kane ka lympung kaba paw jong ka Shillong Sports Association, kaba dei kaba hakhlieh duh jong ki san tylli ki Division phutbol shynrang, ka la long kaba kham heh mynta u snem haba nujor bad ki snem ba ladep, ha kaba 10 tylli ki klob ki ïakhun ban ïohrah ïa ka trophy ha ki 89 tylli ki jingïalehkai league, ha kaba ka jingïakhun kaba 90 bad kaba khatduh kan long mynta ka sngi Saitjaiñ (15 tarik Lber, 2025).
Ka Mawlai kadei ka lahduh ba bat ïa ka burom – bad ki khmihlynti ban khur hat-trick (lai sien lynter) ïa ka nam lahduh hadien ba ki la ïohrah ïa ka ha u snem 2022 bad 2023. Ha kawei pat ka liang, ka Shillong Lajong, kaba long ka klob kaba seisoh tam ha ka SPL – ki la ïoh ïa ka nam lahduh haduh saw sien, kaba khatduh kadei ha u snem 2019. Ka lahduh kan ïoh khung ïa ka khusnam pisa kaba T.6 lak, katba ka kynhun ba wan ba ar (Runners-up) kan ïoh T.3 lak – kane ka long ar shah ïa ka khusnam pisa na ki samoi ba la dep bad ka pyni ïa ka kyrdan jong ka jingdonkam ba ka SPL ka don haki lympung phutbol jong ka thaiñ.
Hadien u snem 2019 la wan ka jingpynthut jong ka khlam Covid-19 bad la duh ban pynlong ïa ar tylli ki samoi lehkai jong ka SPL. Ka Mawlai, kaba la kiew kyrdan na ka First Division hadien ba la kut ka samoi 2019, ki la hap ban ap kham slem ban wanphai biang sha ka OC Blue SPL hynrei naduh ba ki la ïoh ïa ka lad ban ïakhun ki la pynshisha ba ki long kiba khlaiñbor – ha ki 38 tylli ki jingïalehkai SPL naduh u snem 2022, 2023 bad 2024 ki la shah rem tang arsien bad kim pat shah rem mynta ka samoi.
Satang shi sien ïalehkai ban khylliap ïa ka samoi, ka Mawlai ka shong ha khlieh duh jong ka miej ryngkat ki 45 poiñ, katba ka Lajong ka bud nadien ha ka kyrdan ba ar ryngkat ki 42 poiñ. Kane ka mut ba ka Mawlai ka donkam tang ban kiar na ka jingshah rem mynta ka sngi Saitjaiñ ban ïohrah ïa ka nam lahduh kaba lai sien lynter, katba ka Lajong ka donkam ban jop lada ka kwah ban long ka lahduh.
Ban leh ïa kane, ka SLFC ka hap ban pynkylla ïa ka histori ba dang shen – ha ki saw tylli ki jingïakhun ba la dep jong ka OC Blue SPL ka Lajong kam pat shym la lah satia ban pynliem ïa ka Mawlai. Kumban shu pynkynmaw, kine ki arliang ki la ïakynduh ruh ha ka final jong ka Meghalaya State League ha u Rymphang, bad ha kane ka jingïalehkai ruh ka Mawlai ka la long ka nongjop, watla ka rai ka la jam sha ka tie breaker.
Wat lada kam jop, ka kyrdan ba ar kan dei ka kyrdan kaba bha tam ïa ka Lajong ha ka SPL ha kien ki lai tylli ki samoi ba ladep hynrei thikna ba u Coach ka Lajong, Bah Bobby L Nongbet un phaikhmat beit ïa ka kynhun ban rah ïa ka nam lahduh. Ha kawei pat ka liang, u ïakhun pyrshah ïa uwei na ki coach ba la shemphang bad uba la tbit bha – u Bah Hering Shangpliang, uba la ïalam ïa ka Mawlai ban khur ïa ka nam lahduh ha ka SPL 2023 bad MSL 2024. (U Khlain Pyrkhat Syiemlieh u la ïalam ïa ka kynhun ban rah ïa ka SPL ha u snem 2022.)
Watla kim shym la shah rem wat tang shisien ruh ha kane ka samoi, hynrei ym baroh ki jingïalehkai ki ïaid kumba angnud ka Mawlai. Ki la dei ban rah ïa ka burom da kaba pynliem ïa ka Laitkor SC ha ka jingïalehkai ba dang shen hynrei ki la shah pynkordit pat ha katei ka kynhun ba dang thymmai jong ka OC Blue SPL, bad ka jingïalehkai ka la kut ha ka jingïakhaid. Kumta ka Laitkor ka la pynthikna ba ka jingïakhun ban rai ïa ka lahduh kan jam sha ka sngi ba khatduh.
Haba ai jingkren ha ka jingïalang bad ki lad pathai khubor, na ka liang jong u Bah Teibor Dohling – team official jong ka Mawlai u la ong. “Ngi kyrmen ba uwei pa uwei ki nongkyrshan jong Ngi kin wan bad kyrshan ïa Ngi,”
“Lada Ngi la pynliem ïa ka Laitkor Ngi la long ki lahduh lypa hynrei kane kadei kaba ladep. Baroh kiba don ha ka kynhun ki la pynkhreh bha ïa kane ka jingïakhun mynta, kaba long kum ka final.” la ong u Damanbhalang Chyne, da kaba kdew ba ka jingïakhun pyrshah ïa ka Laitkor kam long tang ka “jing pynkyndit” hynrei ka ban ai mynsiem na bynta ki rangïalehkai.
ïa ka Lajong la mihkhmat da u Bah Milan Nongkhlaw – team official, bad u rangap kol ka kynhun, u Siwel Rymbai. U Bah Milan Nongkhlaw u la pyntip ba ka SLFC dang shen ka la ïashim bynta ha ka Bordoloi Trophy ha Assam (ha kaba ki la shah rem noh ha ka semifinal), kumta ki rangïalehkai kim shym la ïoh por than ban shongthait bad pynkhreh. “Ngi hap ban ai khublei ïa ki rangïalehkai kiba la pynpoi ïa Ngi sha kane ka bynta. Ki don katto katne ki jingïalehkai ha kaba Ngi la hiar ka point hynrei ki la leh bha pat ha baroh,” u la bynrap. Na ka liang jong u Siwel, uba mih madan ïa ka Mawlai ha ka SPL jong u snem 2023, u la ong ba ka don ka jingkyndeh kaba khraw ha ki kyrdan ban ïakynduh ïa ka kynhun kaba ïada ïa ka burom na ka bynta ka nam lahduh.
Lah ban kdew ba baroh ar tylli ki kynhun ki sngew ïa ka jingban khia jong kane ka jingïakhun. Ka Mawlai ka tip ba kam donkam ban jop hynrei tang ban kyrshan skhem hadien ka la biang ïa ki – naki 17 tylli ki jingïalehkai hynriew tylli ka la lah ban khanglad ïa ka liang pyrshah ban thep kol (clean sheet). Ha kawei pat ka liang, ym pat don ka kynhun kaba pynkhihjar bun kol mynta ka samoi kham palat ban ïa ka Lajong (ki la thep 59 kol haba nujor bad ka Mawlai kaba thep 54 kol) bad ka la shah thep kham duna (9 kol haba nujor bad ka Mawlai 13 kol). Kim don ei ei ban duh bad kin ïakhun dohïap na ka bynta ka jingjop. Kane ka jingïalehkai ka kular ban long sa kawei pat ka jingïakhun kaba shyrkhei hapdeng kine ki ar tylli ki klob kiba khlaiñbor!