K a 13 tarik u Naiwieng, 2024 kan sa long biang ka sngi ka ban sah jingkynmaw ha Gambegre Constituency hadien ki paidbah ki la leit ban pyndep ïa ka la jong ka kamram ban jied ïa u nongmih bujli ïa u MLA barim uba la hap ban resain noh u Saleng A. Sangma hadien ba u la shah jied kum u MP ba thymmai jong ka Tura Constituency.
Tang mar ïa pynbna ka Election Commisssion of India ban pynlong noh ïa ka elekshon shiteng samoi ha Gambegre Constituency ki kyrtong ki la khih jingmut ban ïoh mih bujli ïa kane ka Constituency kaba don hapoh ka West Garo Hills District.
U Saleng Sangma u la jop haduh lai sien kynthih kum u MLA na Gambegre Constituency bad kumba ka long mynta ka Congress ka kam beit ba ki paidbah kin dang shaniah ha u kyrtong uba ka party ka la jied thymmai ban mihkhmat ïa kane ka Constituency u Jingjang M. Marak.
Wat ki nongïalam ka National Peoples Party (NPP) ruh ki kam ba ka jingïakhun ka long beit tang bad ka Trinamool Congress namarba ka Sadhiarani Sangma kaba dei ka kyrtong na ka All India Trinamool Congress (AITC) ka la shah rem tang khyndiat vote ha ka elekshon sha ka Ingdorbar Thawain kaba la long ha u snem 2023.
Haba bishar ïa ka jingpoi ki nongthep vote ha ka elekshon shiteng samoi ha Gambegre kaba la long mynta ka sngi Balang ka la long haduh 90 percent bad ka Sanjengpara Polling Station ka dei kaba poi bun bha ki nongthep vote kaba kot haduh 95.60 percent. Imat ki dak ki shin ki pynpaw ba ki paidbah ki kwah jingkylla lane ki dang kwah hi da u kyrtong ka seng Congress. Ïa kata, ngin sa lah ban tip haduh ka 23 tarik mynta u bnai.
Ka NPP kaba bat ïa u lakam synshar ka la trei shitom ban pynjop ïa ka kyrtong ka Dr Mehtab Chandee A Sangma na ka National People’s Party (NPP) kaba dei ka kurim jong u Myntri Rangbah ka jylla u Conrad K. Sangma. Pher wiak, lada ka mad ïa ka jingshah rem, kan long ka jingjah burom ïa ka party bad khamtam eh ïa u Myntri Rangbah ka Jylla namarba u hymmen u James PK Sangma u la mad ïa ka jingshah rem ha ka elekshon MLA 2023 bad ka para ka Agatha Sangma ka la mad ïa ka jingshah rem sa ha ka elekshon Lok Sabha na Tura.
Kine ki jingshah rem ha ka party NPP kumba ka paw na ki elekshon ba ladep ka la pynsyier mynsiem thot thot ïa u Conrad Sangma kat haduh ba u la hap ban shimkhia hi dalade ban leit rung manla ki shnong hapoh ka Gambegre Constitueny ban pan vote na ki paidbah.
Lada ka pisa kam treikam ha kane ka elekshon shiteng samoi khlem pep ka jingïaleh kan long kaba shongshit bha hynrei lada ka pisa ka treikam ka jingjop ka rem ka liem ka lup kan thiah shiliang bad sha ki shnong kiba ka pisa ka jur bha u ne ka kyrtong jong kata ka party khlempep kin jop da kaba shu thied ïa ka vote na ki paidbah.
U Chief Electoral Officer (CEO) ka Jylla u BDR Tiwari ha ka jingïakren bad ki lad pathai khubor u la pyntip ba la ïoh kurup T. 12.72 lak ka pisa tad haduh ka sngi thep vote. Na kane, 1.79621 lak ka pisa, 2.09945 lak ka kiad, 2.40 lak u drok bad 5.4248 lak kiwei kiwei ki jingai sngewbha.
Tang ka pisa ba la ïoh kurup ka long 12 lak tam, khlem ïakren ïa kaba ym shym la ïoh kurup. Namarba ka Gambegre ka kham jngai na ka Sor Shillong ka eh bha ban buddien ïa ki jingjia lada ki don makna ki jingïasam pisa bad ka jingsam kiad ïoh ei shimiet shi miet ban bsa ïa ki nongthep vote. Ïa kata, ngi ieh beit ha ki bor ba dei peit jong ka ain ban leh ïa la ka jong ka kamram da kaba peitngor ïa ki jingjia naduh ka sngi ba la treikam ka Model Code of Conduct tad duh ka sngi ba ki paidbah ki la thep ïa ka vote.
Mynta u paidbah u la thiah suk kynjai. Kiba suh kpoh suh snier dei ki kyrtong namarba ki ap ïa ka result kaba u paidbah u ladep ai ban sa pynbna haduh ka 23 tarik mynta u bnai.
