Shillong, Naiwieng 19: U Lat ka jylla Meghalaya u CH Vijayashankar u la ong ba manla ki jylla bad ki union territory ki don la ka jong ka jinglong kyrpang ha ka khana pateng, nangta ka jinghiar pateng bad ka jingithuh, hynrei ïa baroh la tehlang da ka jingma kaba la tip baroh ka jingdon ha ka ri.
U la kynthoh da kaba ong ba na ki lum Himalaya jong ka Uttarakhand, sha ki rithor ka Punjab, ka rud duriaw ba itynnad ka Kerala bad Tamil Nadu, sha ki dewlynnong Andaman, Lakshadweep bad Puducherry, manla kine ki thaiñ ki riewspah lang bad ka India sha ka jingïaid lynti sha ka Viksit Bharat @2047.
Ïa kane u Lat u la ong haba kren ha ka prokram kaba kyrpang ba la pynlong da ka Raj Bhavan ban rakhe ïa ka jingïoh jylla jong ki 17 tylli ki jylla bad ki union territory.
U la ong ba manla ki jylla bad ki union territory ki la nohsynniang sha ka kolshor ka India, ka imlang sahlang bad ka ïoh ka kot bad kiwei ki jingrakhe kiba la ohshrong hapoh ka mynsiem ka ‘Ek Bharat, Shreshtha Bharat’, ka jingiohi u Myntri Rangbahduh ka ri ban pynkhlaiñ, ka jingïalong kawei, ka jingsngew shipara bad ka jingïasngewthuh jingmut wat hapdeng ki jingïapher.
Kham ha shwa, u Principal Secretary sha u Lat u HC Chaudhury u la pynpaw ïa ka jingkongsan ban burom ïa ki khana bad ki kolshor jong ki jylla bad ki UT, naba ki la nohsynniang bha ïa ka ri ha baroh ki liang.
