Manla ka aïom lyiur dap um ki kamra ka Aradonga PHC shem jynjar ki nongtrei bad nongpang

Nongstoiñ, Rymphang 10 : Ka Aradonga Primary Health Centre ka dei ka jaka sumar jong ka sorkar Meghalaya kaba don ha syndah bad ka jylla Assam kaba ai ka jingshakri ïa ki hynñewphew tylli ki shnong kiba hap ha ka jylla Meghalaya bad nalor kitei ki hynñewphew tylli ki shnong ki dang don ruh bun phew tylli kiwei pat ki shnong kiba hap ha ka jylla Assam kiba katei ka PHC ka ai ka jingshakri.
Mynta ka sngi hatmajai, 10 tarik Rymphang u Mawphor u la hiar sha katei ka thaiñ ban leit peit ïa ka jinglong jingman jong katei ka jaka sumar bad la ïoh ban ïakren sani bha bad u Doktor S.Shadap uba dei ruh u Medical & Health Officer jong katei ka PHC. U Dr. Shadap u la ïathuh ba ba ka Aradonga PHC la sumar ruh ïa ki paidbah kiba dei na ki shnong kiba hap ha ka jingpeit jingkhmih jong ka Rambrai PHC kum ka shnong Kyrshai, Ukiam, Nongsung, Darephang, Umbah bad kiwei kiwei namar ka jingbym pat don surok ban leit phah sumar sha Rambrai PHC. Shuh shuh u Dr. Shadap, u la ong ba ha katei ka PHC la hap ba sumar ruh wat ïa ki paitbah nongshong shnong jong ka jylla Assam kum na Hahim, Lalmati bad kiwei pat ki shnong namar ka ka Aradonga PHC ka dei ka jaka sumar kaba khamjan.
Haba pyrshang ban kylli shaphang ka pang Malaria bad don ne em ki nongshong shnong kiba shah ktah u Dr.Shadap u la ïathuh ba ha kine ki ar snem ki don tang ar ngut ki briew kiba dang ïoh ïa kane ka jingpang hynrei hadien ba ki la ïoh ka jingsumar da ka jingtrei shitom na ka liang ki doktor la lah ban pynduh pyndam shisyndon ïakatei ka jingpang.
Watla hapdeng ki jingshakri kiba katei ka ai ka jingshakri ryngkatlang da ka jingtrei shitom jong ki doktor bad nurse ban ai jingsumar, hynrei ka long kaba isynei haba peit bad jngoh ïa kawei pa kawei ka kamra jong katei ka PHC, la lap ba ki don katto katne ki kamra ba ka sad ka la twa bad la hap ban shu kyrshan da ki siej, nalorkata pat ha kiwei pat ki kamra ka sad ka la pyut lut bad pei namar ka jingjaw um ha ka aiom lyiur.
Halor kane ka bynta, u Dr. Shadap u la ïathuh tang shu poi ka aïom lyiur ne ha ka por ba hap u slap kiba wan shah sumar, ki hap ban thiah ha baranda jong ka PHC na ka daw ka jingjaw um, kumjuh ruh ka kamra buh dawai. Halor kane ki nongtrei bad nongshah sumar ki shem shitom shem jynjar haduh katta katta bad ka la i donkam kyrkieh eh ïa ka tnad bad ka sorkar ban shimkhia ban phah moramot bad pynbha ïakatei ka PHC khnang ba ka jingsumar ïa kiba pang ba shitom kan long kaba bit ba biang. Ban shu iehnoh shrah kumba ka long mynta, ka long kaei kaei kaba pynlehraiñ ym ïa ki nongtrei bad kiba pang ba shitom hynrei……., ka pynlehraiñ ïa ka tnad ka koit ka khiah bad ïa ka sorkar jylla.