Imphal, Risaw 01 : U Myntri Rangbah ka Manipur N Biren Singh ha kajanmiet sngi U Blei ula pyntip ba ki riewkiengatiar kiba donkti ban rahbor bad pyniap ïa ki arngut ki samla pule, ki la shah kem mynta na Churachandpur.
Haba thoh ha ka X, u CM ula ong “Nga sngewkmen ban pyntip ba katto katne ngut na ki briew kiba donkti ban rahbor bad pyniap ïa Phijam Hemanjit bad Hijam Linthoingambi, ki la shah kem hynne ka sngi na Churachandpur”.
“Kumba ju ong, don kiba lah ban ïaid lait hadien ba ki leh kam bymman hynrei kin ym laitphet na ki kti ba jrong jong ka Aiñ. Ngi la rai skhem ban pynthikna ba kin ïoh ïa ka jingpynsajia ba tyngeh kynthup ka rai pyniap namar ka kam ba shyrkhei ba ki la leh” ula ong.
Haba kren bad ki nongthoh khubor, ula ong ba u Myntri kam Pohïing ka Ri Amit Shah ula phah ïa u Special Director ka CBI lem bad katto katne ki Ophisar sha Manipur bad mynta ka sngi da ka jingkyrshan ki shipai, ki Assam Rifle bad ki Pulit, ngi la ïoh kem ïa 4 ngut ki briew ba donkti na Churachandpur. Kane ka dei ka jingjop kaba khraw. Nga kwah ban ai khublei ïa NIA, CBI bad baroh ki bor pahara ka Sorkar Pdeng”.
