Mang pisa ka Sorkar Jylla sha ki DC ban pyntreikam noh ïa ka MRSSA

Shillong, Risaw 31: Ka Sorkar jylla lyngba ka kyrwoh khubor ka la ong ba kum shi bynta ban pyntreikam noh ia ka Meghalaya Residents Safety and Security Act (MRSSA) 2016 ka la thaw ïa ka scheme ban buh pisa ha ki kti jong ki Deputy Commissioner lyngba ki District Task Force (DTF) khnang ban pyntreikam ïa ka ne ka aiñ hapoh ka Jylla kaba dei ka aiñ ba la thaw da ka sorkar ban khanglad \a ka jingwan rung kyrthep ki mynder ri bad ki bar jylla shapoh ka jylla Meghalaya.
Ka kyrwoh khubor ka la ong ba khnang ban pyntreikam ïa ki kyndon jong ka Aiñ, la thaw ïa ki District Task Force ha kaba ki Deputy Commissioner ki dei ki Chairperson bad ki Additional Deputy Commissioner/Asst Commissioner kum ki Secretary ha kaba ïadei bad kane ka kam.
Ki dkhot jong ka Task Force kin kynthup ïa ki Superintendent of Police, Inspector ka Supply, Inspector ka Labour, Inspector (Infiltration Branch), Anti-Infiltration Directorate, ki nongmihkhmat na ki Autonomous District Council bad arngut ki dkhot non-official ki ban dei na ki bor shnong.
La ïathuh ruh ba ka jingthmu jong ka Meghalaya Residents Safety and Security Act (MRSSA), 2016 ka long eh ha ka ban pynthikna ïa ka jingpynkhlaiñ ïa ka jingpeit bniah ïa ki nongshong wai bad ban pynthikna ïa ka jingshngaiñ bad jingïada jong ki nongshong shnong ka Jylla da kaba khanglad ïa ki kynhun bymman ban ïoh jaka rieh ha ka Jylla kaba lah ban ktah ïa ka suk ka saiñ, ban pynshisha bad teh kyndon ïa ki nongshong wai kiba sah ha ki ïing ba la ai wai ha ka Jylla, ban thaw ïa ki District Task Force bad ki Facilitation Centre, ban pynsuk ïa ka jingpyntreikam kaba paka ïa ki aiñ bapher bapher bad na ka bynta ka jingshngaiñ jong ki nongshong shnong ha kane ka jylla hi baroh kawei.