Mang pisa ka sorkar ban shna ïa ka surok na Mawsynram – 18 Mile, Ranikor ba 265 klur bad 361 klur ïa ka Surok na Maweit – Nongjri

Mawkyrwat, Nohprah 21 : Ka long kaei kaei kaba pynkmen na ka bynta ki paidbah jong ki lai tylli ki Constituency kata ïa ka Mawsynram, ka Ranikor bad kumjuh ka Mawshynrut ha kaba na ka liang ka sorkar ka la dep ban mang pisa kyrpang ban shna ïa ki surok kiba bha ka ban pynsuk ïa ka leit ka wan jong ki paidbah hapoh ki dong ki thaiñ jong ki.
Ha kaba ïa dei bad kane ka jingmang pisa ban shna ïa ki surok ka long ka surok na Nongstoiñ – Maweit kaba hap ha ka Mawshynrut Constituency ka ban leit bad pynïasoh sha Nongjri jong ka Ranikor Constituency ha ka jingmang pisa kaba T. 361 klur tyngka kaba dei ha ka jingjngai ba 35 kilometer. Kawei pat ka dei ban shna ïa ka surok Intermediate Lane kaba dei 47 kilometre ka ban sdang naduh na Phlangwanbroi shaduh 18 Mile, Ranikor ha ka jingmang pisa kaba T. 265 klur ha kaba ïa kane ka mang pisa ba thymmai la dep ruh ban khot tendar.
Namarkata, halor kane ka jingbhah bad mang pisa jong ka sorkar ban shna ïa ki surok ki MLA jong ki lai tylli ki Constituency kata u bah Pius Marweiñ, MLA ka Ranikor Constituency, u bah Olansing Suin, MLA ka Mawsynram Constituency bad u bah Methodius Dkhar, MLA ka Mawshynrut Constituency haba kren ha ki lad pathai khubor ki la pynpaw ka jingaikhublei ba kyrpang ïa u Conrad K. Sangma uba dei u Myntri Rangbah ka Jylla Meghalaya, bad ïa baroh ar ngut ki Symbud Myntri Rangbah ka Jylla Meghalaya kata u bah Prestone Tynsong uba bat ruh ïa ka kam kum u Myntri ka Tnad ba peit ïa ki surok bad ïa u bah Sngewbhalang Dkhar kiba la sngap ïa ka jingkyrpad bad ka jingud ha kaba ïa dei bad ka jingdonkam jong ki lynti ki synkien kiba bha.
Ym tangkata, ka jingkhublei ka leit ruh sha ki paidbah jong ka Ranikor Constituency, ka Mawsynram Constituency bad Mawshynrut Constituency kiba long kiba ïai shah bad shaniah ha ka jingïalam jong ki kum u nongmihkhmat ban don ka jingïatreilang ban wanrah ïa ka roi ka par hapoh ki dong ki thaiñ.
Haba kren ha kaba ïa dei ba ka surok na Mawsynram – 18 Mile, Ranikor, u bah Pius Marweiñ u la pynkynmaw ba ha kine ki snem ba la dep na ka liang jong u lem bad u bah Olansing Suin kiba dei ki nongmihkhmat paidbah ki la leit ban ïa kynduh ïa u Conrad K. Sangma uba dei u Myntri Rangbah ka Jylla Meghalaya ha kaba ki la leit ban pynsngew ïa ki jingeh jong ki paidbah ka dong ka thaiñ khamtam ha ka ïaid ka ïeng lyngba ki surok namar kumba ong, “Ka surok ka dei u budlum jong ka roi ka par”.
Ula ong ruh ba kum la tip ka surok na Mawsynram haduh 18 Mile, Ranikor ki paidbah ki la mad ïa shibun ki jingeh namar ka jingsniew palat ki surok bad ki jingangnud jong ki paidbah ruh ka la long da ki phew phew snem ban ïoh ka surok ba bha bad na ka liang jong ki ruh kim shym la shongkli kti hynrei ki la leit ban ud ban nam sha ka sorkar.
Kumta ha kaba kum kata ka jingïakhun bad jingïaksaid, ka sorkar ka la sngap bad ha kine ki khyndiat sngi ba la dep, ka la mang pisa thymmai bad khot tendar ruh ban shna ïa ka surok Intermediate Lane kaba dei 47 Kilometar ka ban sdang naduh na Phlangwanbroi shaduh Shnong 18, Ranikor ha ka jingmang pisa kaba T. 265 klur.
Namarkata, ki don ka jingkyrmen ba ha kine ki snem ki ban wan ki paidbah kin sa ïoh ban ïaid ha ka surok kaba bha bad ba paka da kan sa long ka jingkyrkhu na ka bynta ki paidbah jong ka Mawsynram,ka Ranikor bad Mawshynrut baroh kawei.