Shillong, Nailar 28: Ka sorkar pdeng ka la mang palat T. 1200 klur na ka bynta ban shna ïa ka surok kaba 63 kilometer na Phulbari (Chibinang) sha Tura kaba ha West Garo Hills district.
Ïa kane la ïathuh da u Vivek Anand Sharma, Executive Engineer (NE) for DG (RD) & SS, Ministry of Road Transport & Highways ha ka shithi ba la phah sha u state general secretary ka BJP u Amitava Saha ha ka 22 tarik mynta u bnai.
U Saha ha ka 8 tarik u Naitung u la thoh sha ka sorkar pdeng haba ïadei bad ka jingsniew palat ka surok kaba ha Chibinang ban leit sha Tura.
“Haba ïadei bad kane, la pyntip ba ka surok kaba ïar na Phulbari (hajan Chibinang) ban leit sha Tura la ithuh kum ka NH-127B. Ka jingjrong ka surok ka long malu mala 63 km la shim ban shna kum ka two lane kaba la mang ban pyntrei ha ki 2 bynta lyngba ka jingbei tyngka ka JICA,” ong u Sharma.
“Ka Package-I kaba ka jingjngai ka long 31.50km ha ka jinglut baroh kaba T. 737 klur ka dang don hapoh ka jingkyrpad bad ïa ka kam ha ka package-II kaba 31.72km da ka jinglut kaba T. 504 klur ka la sdang ha ka 16 tarik u bnai Jymmang, 2025,” u la ong da kaba pyntip ba ka kam ha baroh artylli ki bynta la thmu ban pyndep ha u snem 2027.
Ha ka jingkren, na ka liang ka BJP ka la ong ba ka jingmang pisa kaba T. 1200 klur da ka sorkar pdeng ka dei sa kawei pat ka nuksa ba ka BJP ka ïeng da ki jingkular ban wanrah ki kam pynroi ha baroh ki liang.
