Shillong, Risaw 11 : U Myntri Rangbah ka Jylla Conrad K Sangma ha ka sngi Thohdieng u la leit ban jurip ïa ka surok na iew Wansing sha Dorrengre.
Ha ka jingïakren abd ki paidbah hadien ba la wan ban jurip, u Myntri Rangbah u la ong ba kiba bun balang ki la pynpaw la donkam ban shna noh ïa katei ka surok.
“Kane surok ba don ha Dalu – Gambegre ka jan bha sha Tura bad ka long kaba kongsan bha na bynta ki paidbah ka thain namar man ka por ki ju wan ki paidbah ban wan kyrpad na ka bynta ban shna noh ïa kane ka surok,” u la ong.
Ha kajuh ka por u la ong ba u dap da ka jingkmen ban pyntip ba ïa ka Detailed Project Report na bynta katei ka surok ki la dep ban pynkhreh da ka tnad PWD bad shen yn sa shna noh ïa kane ka surok.
Kane ka surok na ïew Wansing sha Dorrenge ka don tang kumba 5.5 kilometer bad ka jingmang tyngka ka long 5.56 klur tyngka.
Ki paidbah ki la pynsngew ruh ha u Myntri Rangbah shaphang ka Chiksagre Sub Centre ha kaba ïa ka jingtrei kaba la sdang ban tei la sangeh noh. Ki paidbah ki kyntu ruh ïa u Myntri Rangbah ban phah pyndep ïa katei ka jingtrei na bynta ka jingmyntoi jong ki paidbah ka thaiñ.
Nalorkine, ki paidbah ki la kyrpad ruh ïa u Myntri Rangbah ban pynïoh da uwei pat u transformer bad ki sem long ïew ha ka ïew Wansing.
U Myntri Rangbah u kyntu ruh ïa ki paidbah ka thaiñ ba un sa bishar bniah ïa katei ka jingkyrpad jong ki bad buddien ruh katba na ka bynta ki sem ïew ha katei ka ïew un sa mang pisa na ka Chief Minister Development Fund.
