Mawkyrwat, K’lyngkot, 18: U bah T. Lyngwa, District Magistrate ka South West Khasi Hills District Mawkyrwat u la ai ïa kane ka jingpynbna paidbah ba katkum ka jingbthah ka Election Commission ka ri India ka jingsam pisa, kyiad bad kino kino ki jingai sngewbha sha ki nongthep vote ka long ka jingbam klop bad beaiñ.
Kumta ha kaba ïadei bad kane ka ophis ka la thung ïa ki Flying Squad kiba peit bad khmih lada don kum kata ka jingsam pisa, kyiad ne kino kino ki tiar ha kane ka por elekshon.
Ha kajuh ka por la kyrpad ruh ba lada don kino kino kiba rah bun ka pisa ha kano kano ka konstitwensi ha kane ka por elekshon ki dei ban don ki kot ban pynshisha ïa ka jingdonkam jongki ban lait na ka jingshahkem bad lada don kiba pyrshang ban leh ïa kitei kiba la kdew haneng ki paidbah ki lah ban pyntip sha u 94851 53270.
