Nongpoh, Ïaiong 22: Kino kino kiba pynlait ïa ki jaboh sha ki wah ne ki jaka paidbah kiba ktah ïa ka mariang bad ïa ka koit ka khiah ki paidbah kin sa shah pynshitom katkum ki kyndon aiñ jong ka sorkar bad ban khanglad ïa kum kine ki jingpyntuid jaboh sha ki wah ne ki jaka paidbah na ka liang u Deputy Commissioner ka Ri Bhoi u la pynjari syndon da ki kyndon aiñ ba tyngeh ïa kino kino kiba pynkheiñ aiñ.
Ka kyrwoh ba la phah da da u Deputy Commis sioner ka Ri Bhoi, u Arpit Upadhya, u la pyntip paidbah na ka bynta ki paidbah ha Ri Bhoi ba la pynjari ïa ka section Section 25 bad 26 jong ka Water (Prevention and Control of Pollution) Act, 1974 bad lyngba kane ka aiñ la khang pyrshah ïa kino kino ki Karkhana ne ki riew shimet kiba treikam ïa kino kino ki jaid kam ba pynmih ïa ki jaboh ba kim dei ban pintuid sha ki wah ne ki jaka paidbah bad shuwa ba kin leh ïa kitei ki kam ruh ki dei ban ioh jingbit shuwa na ka State Pollution Control Board ka Meghalaya.
La pyntip ruh katkum ka section 21 ka Air Water (Prevention and Control of Pollution) Act, 1981, la khang pyrshah ïa kino kino ki Karkhna ne ki kam seng kam seng jam ban seng kam seng jam ba pynmih ïa ka lyer ba jaboh bad shuwa ba kin leh ïa kitei ki kam ruh ki dei ban ioh jingbit shuwa na ka State Pollution Control Board ba kan peit kan khmih shuwa bad ruh ban bud katkukm ka kyndon kiba ym dei ban pynmih ïa ki lyer ba jaboh kaba ktah ïa ka mariang bad ïa ka koit ka khiah ki paidbah.
Na ka liang u Deputy Commissioner ka Ri Bhoi u la pyntip paidbah ruh ba kane ka long kum ka jingpyntip paidbah sha baroh ki nongshong shnong ka Ri Bhoi ne ki kynhun sengkam seng jam la ki dei ki riew shimet ne ki kynhun haba ki pyntreikam ïa kino kino ki kam ki hap ban bud ryntih ïa ki kyndon bad ki hap ruh ban ioh ka jingbit shuwa na ka State Pollution Control Board bad lada ki ïaleh pyrshah ïa kine ki jingpyntip ne ki jingma kin shah pynshitom katkum kitei ki kyndon ba la pynjari da u Deputy Commissioner ka Ri Bhoi District.
Shuh shuh, la pyntip ruh ba ki paidbah kiba donkam ban ioh jingbit ki dei ban leit wad jingtip shuwa na ka ophsi ka Meghalaya State Pollution Control Board kaba don ha Lumpyngngad Shillong ha ki sngi ba long trei lane ki lah ruh ban peit lyngba ka Website megicmms.nic.in. ban ioh ïa kajingtip kaba bniah.
