Nongpoh, Nailur 12: Ba la mih ki jingujor halor ka jingwan bret pathar ïa ki jaboh kiba pynsma iwtung ha ka leit ka wan ki paidbah, ka Dorbar Shnong Nongpoh ha ryngkat ka Committee Dong Up Gate, ki la buh syndon da ka jingmana kaba tyngeh ïa kino kino kiba wan bret jaboh ha ki jaka shnong.
Kane ka jingmana ka Dorbar Shnong Nongpoh ryngkat ka Committee Dong Up Gate, ka dei ruh hadien ba kiba bun ki nongshong shnong bad ruh ki khynnah skul ki la ujor sha ka shnong halor ka rukom bret pathar ïa ki jaboh, kiba la ktah ïa ka khuid ka suba jong ka shnong ka thaw bad khamtam ka jingsma iewtung kaba mih haba ki wan bret ïa ki jaboh ba la pyut ha ki bynta jong ka dong Up Gate kaba hap kyntoit dong Lumsohphoh ha Nongpoh.
Halor kane ka jingud jingnam ki paidbah kiba shah ktah na ka jingbret pathar ïa ki jaid jaboh bapher bapher la ju iohi ne sakhi, ha kaba ïa kane ka kam khlem akor ki la shu wan bret tuh ne leh ha ka por mynmiet.
Haba ïa kren sha ki lad pathai khubor, u Secretary Shnong ka Shnong Nongpoh, u Bah Anthony Suchiang bad u Rangbah Dong ka Dong Up-Gate u Bah Albinus Lamo, ki la ïa thuh ba ka shnong ka la ioh ïa ka jingujor na ka por sha ka por na ki paidbah bad ki khynnah skul, kaba la ktah na kane ka jingwan bret pathar ïa ki jaboh bad kum ka shnong na ka bynta ka khuid ka suba ka hap ban shim ïa ka jingkitkhlieh ban buh syndon da ka jingmana bad lada dang lap nangne shakhmat kino kino kiba wan bret jaboh kin ngat syndon da ka kuna kaba heh.
Shuh shuh, kitei ki nongïalam Shnong ki la kyrpad ïa baroh ki nongshong shnong ne wat ki briew kiba na shabar ka shnong kim ban wan bret jaboh pathar ha pud u sam ka shnong Nongpoh khamtam ha katei ka dong Lumsohphoh bad kum ka shnong kan pynlong ïa ka jingpeitngor, ha kaba lada lap ïa kino kino kiba ïaleh pyrshah ka shnong nalor ka kuna kaba heh kan sa leh ruh da ki lad ba tyngeh, ki la bynrap.
